e-Boksit takuuk: Akileraarpallaarsimallutit utertoorutissaqarpit imaluunniit akiligassinneqarpit?

Akileraartarnermut Aqutsisoqarfiup inaarummik naatsorsuutit akileraartartunut 49.154-inut e-Boks-ikkut nassiussorpai. Akileraarutivit ilaannik utertuussanerlutit imaluunniit akileraarutinut akiliinikippallaarsimanerlutit inaarummik naatsorsuummi takusinnaavat.

Inaarummik naatsorsuut e-Boksinni imaluunniit Sullissivik.gl-ikkut takusinnaavat. Tassani takusinnaavatit siorna aningaasarsiarisimasatit, ilanngaatitit akileraarutinullu akilersimasatit. Takusinnaavattaaq utertoorutissaqarnerlutit akileraarutinulluunniit akiliinikippallaarsimanerlutit.

Inaarummik naatsorsuummi sulinermut ilanngaammik pisarnerlutit takusinnaavat. Ilanngaat sulinikkut isertitatit tunngavigalugit naatsorsorneqarpoq. Sulinermut ilanngaatip annertussusia qaffakkiartuaartuuvoq, taamaalillutik isertitakitsut akunnattumillu isertitallit aningaasat namminneq atugassaat 2022-mi 10.296 kr.-it tikillugit amerleriarput.Sulinermut ilanngaat naatsorsorneqarneralu pillugit paasissutissat erseqqinnerusut Sullissivik.gl-imi ”Akileraarutikka”-mi takusinnaavatit.

Akileraarutinik akiliivallaarsimallutik utertoortussat, sulinermullu ilanngaat
Ukiumut akileraarfiusumut 2022-mut tunngatillugu akileraarutinut akiliivallaarutit 292,4 mio. Kr.-it Akileraartarnermut Aqutsisoqarfiup inunnut 32.997-inut 2023-mi aggustip 30-ani 31-anilu utertissavai. Taakkuninnga sulinermut ilanngaatit 75,3 mio. kr.-inik annertussusillit utertoorutissanut ilanngunneqarput.

292,4 mio. kr.-it ilaat 79,1 mio. kr.-it (tunniunneqartussat tamarmiusut 27,05 %-iisa missingi) ilanngaassinikkut, inangiinikkut arsaarinninnikkulluunniit pisortanut akiitsunut matussutissatut akilersinneqarput. 38,4 mio. kr.-it nunatsinni kommuninut, INI A/S-imut, Iserit A/S-imut aamma Nukissiorfinnut il.il. akiitsunut matussutissatut akilersinneqarput sinneruttullu 40,7 mio. kr.-it Namminersorlutik Oqartussanut akiitsunut matussutigineqarlutik.

Utertuussaguit Akileraartarnermut Aqutsisoqarfiup aningaasat Nemkontunnut ingerlaannaq ikissavai. Ingerlaannarli ikisinissaq Nemkontoqaruit aatsaat pisinnaavoq. Nemkontoqanngikkuit akileraarpallaarutivit tunniunneqarnissaat utaqqissikkallarneqassapput. Nemkontoqanngikkuit pilersitsisariaqarputit Nemkontutaareeruillu Akileraartarnermut Aqutsisoqarfimmut tamanna nalunaarutigalugu. Tamatuma kingorna Akileraartarnermut Aqutsisoqarfiup akileraarpallaarutitit Nemkontunnut ikissavai.

Akileraarutissat sinneri
2022-mut tunngatillugu akileraarutissat sinneri 138,5 mio. kr.-it akileraartartunut akileraarnikippallaarsimasunut 8.132 -inut akiligassiissutigineqassapput. Akileraarutissat sinnerinik akiligassiinermi Sulinermut Ilanngaatit 7,8 mio. kr.-inik nalillit ilanngunneqarput.

2022-mut inaarummik naatsorsuutip takutippagu akileraarutinut akiliinikippallaarsimasutit, taava Akileraartarnermut Aqutsisoqarfiup akileraarutissat sinnerisa ilaat 18.000 kr.-it nalingi nuussinnaavai, ernialiussaq 6% ilanngullugu.

Tamanna ima paasineqassaaq, 2022-mut akileraarutissavit sinneri 2024-mi akileraarutitigut ilanngaatissavit ilanngarneratigut akilersinneqassapput. Akileraarutit sinnerinut ernialiussaq 6% sipaarusukkukku periarfissaraat akileraarutit sinnerisa nuunneqartut nammineq kajumissutsinnik akilernissaat (§5 naapertorlugu akiliuteqarnikkut) tamannalu kingusinnerpaamik pissaaq 20. november 2023-mi, aningaaserivimmi konto 6471-1002608 atorlugu akiliinikkut. Akiliutitit tassaapput akileraarutit sinnerinut akiliutit, ernialiussaq 8 % ilanngullugu.
Akiliinermi allallugit ilanngutissavatit cpr-it aamma ”/2022/§5”.

Akileraarutissat sinnerisa ilaat 18.000 kr.-inik ilanngakkat naafferaartumik akilersorneqassapput, 2023-mi septembarimi, oktobarimi novembarimilu. Akileraarutissat sinneri akilerneqanngippata qaammammut 1 %-imik ernialersorneqassapput taannalu akileraarutissat sinnerisa tamaasa akilerneqarnissaasa tungaanut ingerlanneqassalluni.

2022-mi soraarnerussutisiaqalernissamut aaqqissuussinermut peqataasussaatitaaneq pillugu takussutissat tamakkiisut
2022-mut inaarummik naatsorsuutip saniatigut soraarnerussutisiaqalernissamut aaqqissuussinermut peqataasussaatitaanermut tunngatillugu 2022-mut naatsorsuutit nassiunneqassapput.

Soraarnerussutisiaqalernissamut aaqqissuussinermut peqataasussaatitaaneq pillugu naatsorsuummi takuneqarsinnaavoq, soraarnerussutisiassanut akiliutigisimasat naammannersut. Soraarnerussutisiaqalernissamut ileqqaakkannut 2022-mut tunngatillugu akileeqqullutit allaffigineqaruit, taava akiliinerit Akileraartarnermut Aqutsisoqarfimmut uppernarsassavat.

Ukiumoortumik naatsorsuutit takutippassuk 2022-mut Ileqqaaruteqartussaatitaanerit naammassisimagit tassunga tunngatillugu iliuuseqaqqittariaqanngilatit.

Pigisanit pissarsiat ilaasa akileraarutaata naatsorsorneqarnera
2022-mut inaarummik naatsorsuutip nalinginnaasup saniatigut Akileraartarnermut Aqutsisoqarfiup, pigisanit pissarsiat ilaasa akileraarutaata (KAS-ip) 2022-mut naatsorsorneqarnera immikkut ittumik aamma nassiutissavaa.

---------------------------------------------------------

Akileraartarnermut Aqutsisoqarfimmit allakkat e-Boksi atorlugu nassiunneqartalerput

Pisortat allakkanik digitalimik nassiussisarneq ulloq 1. januar 2021 aallarnerfigalugu atulerpaat. Tamanna isumaqarpoq, pisortanit innuttaasunut allakkat siunissami annertunerusumik Sullissivik.gl aamma e-Boks aqqutigalugit apuussorneqartalissasut. e-Boks atorsinnaassagukku MitID-qassaatit. MitID-qanngikkuit, taanna Kommunip innuttaasunut sulissivianut imaluunniit aningaaserivinnut saaffiginnillutit akeqanngitsumik pissarsiarisinnaavat.

Innuttaasut 1950 sioqqullugu inunngorsimasut, allallu allakkanik digitalimik nassiunneqartunik pisussaajunnaarsinneqartut, Akileraartarnermut Aqutsisoqarfimmit allagarsiassat allakkerisarfikkut suli nassiunneqartassapput.

Allakkanik digitalimik nassiussisarneq pillugu paasissutissat erseqqinnerusut takukkit uani: Sullissivik.gl

--------------------------------------------------------

Nemkontukkut akiliineq
Pisortaqarfinnit aningaasanik akiliineq aggustip 12-iat 2023 aallarnerfigalugu NemKontukkut ingerlanneqartalissaaq.

Kontuvit ilaat NemKontussatut nalunaarsorsimanerlugu paasiniarlugu internetbrowserikkut netbankinni misissuisinnaavutit, imaluunniit nemkonto.dk aqqutigalugu paasiniaasinnaallutit.

Kontorisavit ilaat NemKontussattut nalunaarsorsimanngikkukku, nalunaarsuinissaq pisariitsuarannguuvoq.

Netbank aqqutigalugu nalunaarsuineq pisariinnerpaavoq, tassanimi kontorisat sorleq NemKontutut nalunaarsussanerlugu toqqaannartussaagakku.

NemKonto.dk aqqutigalugu kontomik aamma nalunaarsuisinnaavutit. Uanili maluginiaruk atuutilersitsissummik kodimik allakkatigut nassinneqaqqaassagavit. 

--------------------------------------------------------

Qulaanut tunngasunut apeqqutit (innuttaasuniit)
Attavigiuk Akileraartarnermut Aqutsisoqarfik, tlf. + 299 34 65 00, mail: tax@nanoq.gl