AtuartigukNuussuarmi Tupaasat kitaanni qaqqaq sisoorsimasoq pillugu paasissutissat nutaat
Nassiussisuuvoq: Aatsitassanut Inatsisillu Atuutsinneqarnerannut Naalakkersuisoqarfik
Juulip 17-ianni 2023-imi Aatsitassanut Inatsisillu Atuutsinneqarnerannut Naalakkersuisoqarfiup nalunaarutigaa Nuussuarmi Sullorsuup tungaanut sinerissap qaqqaasa sivinganeranniittumi qaqqaq 2022-23-imi ukiuunerani sisoorsimasoq. Takuuk assi 1.
Nalunaaruteqarnerup kingorna naalakkersusioqarfiup ujarassiuuisa sumiiffik pineqartoq tikillugu misissorsimavaat. Takuuk assi 2.
Sisoornerup annersaa 550 meterisut qatsitsigisumi maninnersamut unissimavoq, annikinnerusorlu imerpalanerusuusoq marullummik ujaqqanillu nassataqartoq qaqqap qooruisigut sivinganermut appasinnerusumiittumut siammaassimalluni, sinerialli angusimanagu. Takuuk assi 3.
Ujarassiuut ilimagaat sisoornerit annikitssut sumiiffimmi pineqartumi suli pisinnaassasut, igammik siallersimatillugu aputilluunniit aattornerata nalaani. Sioornerit ilaat imaanut anngussinnaapput, taamaallaalli qanittuani ulorianaateqarsinnaallutik.
Nunap sannaa silallu pissusaata allanngornera apequutaatillugit sisoorfiit nutaat pilersinnaapput. Taamaammallu ujarassiuut sineriak pineqartoq assit silaannarmeersut qaammataasaneersullu atorlugit nakkutigivaat.
Aatsitassanut Inatsisillu Atuutsinneqarnerannut Naalakkersuisoqarfiup suli inassutigaa Sullorsuup sineriaanut qanittumi angalanerup mianersortumik ingerlattarnissaa, sulimi qaqqanit sisoortoqarsinnaammat.
Qaqqat qajannaatillit, ujaqqalluunniit qaqqanit nakkaalaakkajuttut pillugit ilisimasaqaraanni Ujarassiornermut immikkoortortaqarfik nittartakkakkut saaffigineqarsinnaavoq. Nalunaaruteqarnermi immersugassaq uani immersorneqarsinnaavoq:
https://govmin.gl/da/fjeldskred-og-overvaagning/indberetning-2/#formular
Paasissutissat innuttaasuneersut nunatsinni qaqqanik sisoorsinnaasunik sumiissusersinissannut tapertarineqassapput.
Paasissutissanik annertunerusunik piniarnermi attaveqarfigineqassaaq naalakkersuisoqarfimmi pisortaaneq Jørgen T. Hammeken-Holm e-mail joeh@nanoq.gl imaluunniit oqarasuaat +299 346846.
Assi. 1. Nunap assinga. Qaqqaq sisoorfiusoq sungaartoq aappaluartumik nalunaaqutsigaavoq.
Assi 2. Qaqqaq sisisoorsimasoq qanimut assilineqarsimasoq. Quppaq sisoorfiup qummut killigisaa titarnermik kisiukkaartumik sungaartumik nalunaaqutsigaavoq Sanimut takissusaa 400 meterip missaaniippoq. Sisoortup qummut iigaata issussusaa 20-50 meterisut issussuseqarpoq.
