Peqqinnissaqarfiup nutaamik aaqqissuuteqqinneqarnissaa pillugu isumaqatiginninniarnissaa kinguartinneqarpoq

Peqqinnissaqarfimmik aaqqissuusseqqinnissaq pillugu pingasunngornermi ulloq 2. august 2023 internet aqqutigalugu isumasioqatigiinnissamut Naalakkersuisut Inatsisartuni partiinik ataatsimiigiaqqusisimasut ulloq 18. juli 2023 nalunaarutigineqarpoq.  

Ullormi pineqartumi partiit tamarmik katersornissaasa periarfissaasimannginnera pissutigalugu isumasioqatigiinnissaq kinguartikkallarpoq. Tamatumani sapinngisamik partiit amerlanersaat peqataatinniarneqarput taamaalillunilu Peqqinnissaq pillugu Ataatsimiititaliarsuup innersuussutai tunngavigalugit peqqinnissaqarfimmut tunngatillugu partiit kissaataat pingaarnersiuinerallueqqartorneqasallutik.

Partiit pingaarnersiukkatik ukiumut ataatsimut, ukiunut tallimanut qulinullu agguassagaat Peqqissutsimut Naalakkersuisup Mimi Karlsenip partiit qinnuigai.

Peqqissutsimut Naalakkersuisup Mimi Karlsenip nammineerluni pingaarnersiukkani saqqummiutissavai ima qulequtserlugit:

1. Nappaammik pinartumik ajoqusernermillu katsorsaanissamik qulakkeerinninneq
2. Nalinginnaasumik nakorsaasersuilluni katsorsaanermik qulakkeerinninneq
3. Kræftimik katsorsaanissamik qulakkeerinninneq
4. Naartunerit erninerillu isumannaatsuunissaanik qulakkeerinninneq
5. Tarnikkut nappaatilinnik sullissinermik ineriartortitsineq

Nutaamik ulluliilluni partiinik ataatsimiigiaqqusineq piaartumik  nalunaarutigineqarumaarpoq.

Sukumiinerusumik paasisaqarniaruit naalakkersuisup allattaa Naja Lynge-Petersen nalp@nanoq.gl-ikkut attavigiuk