AtuartigukEqqagassat annertuumik ajornartorsiutaanerinut kommunit akisussaaffik tigusariaqarpaat
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Nunatsinni kommunini arlalinni eqqakkat pillugit ajornartorsiutit innuttaasunit kipiluttunartorsiorfiusut suli annertusiartorput. Kommunit eqqakkanik passussinermut piiaanermullu akisussaasuunerannik – aammalu ammaannartumik ikuallaasarnerit eqqakkanik ajornartorsiuteqarnermik aaqqiissutissatut attanneqarsinnaannginneranik eqqaaseqqinneqartariaqarput.
Eqqakkat ajornartorsiutaanerujussuat, tusagassiorfitsigut ersersinneqartartoq ajornartorsiutit annertuut, piffissami sivisuumi eqqagassalerinitsinni atuussimasut aaqqiiffigissagutsigit, eqqagassalerinermi annertuunik aaqqiinissap pisariaqarneranik ersarissorujussuarmik takutitsivoq.
Kisiannili qinikkat politikkikkut oqaaseqartarnerat, § 37 naapertorlugu apeqquteqaatit tigusat aammalu Nunalerinermut, Imminut Pilersornermut, Nukissiutinut Avatangiisinullu Naalakkersuisumut allakkat ammasut taama ersaritsigisumik takutippaat, kinaassusersiunngitsumik sulianullu tunngassuteqartumik tunngaveqarluni oqallinnissaq pisariaqartoq. Oqallinnissaq pisariaqarpoq – aammalu innuttaasut kipiluttunartorsiortut, eqqagassalerinerup ajornartorsiorfiunerani toqqaannartumik eqqugaasut paasitinneqartariaqarput.
”Oqaaseqaatit, qinikkat akornanni kukkusumik akerlilersorneqaratik ingerlanneqartut erseqqissaaviginissaat uannut pingaaruteqarpoq. Taamaattumik tamanut ersarilluinnartumik manna erseqqissaatigisariaqarpara: kommunit eqqagassalerinermi pingaarnertut akisussaasuupput. Kommunit eqqagassalerinernut eqqakkanillu piiaanernut akisussaasuupput”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq nangillunilu:
”Kommunit eqqagassalerinermi ajornartorsiutit, illoqarfinni nunaqarfinnilu annertusivallaartut iluarsiiviginiarlugit akisussaaffik tigusariaqarpaat. Naalakkersuisuniit innuttaasut peqqissusaat eqqarsaatigalugu, aammalu avatangiisigut paariniarlugit eqqakkanik ajornartorsiuteqarnermut aaqqiissutissanik naleqqunnerpaanik ujartuinermi oqaloqatigiinnitta pilersitsiviusussap ingerlateqqinnissaanut piumasassuseqarluarpugut. Kisiannili suli isumaqarpunga – aningaasaqarneq avatangiisillu eqqarsaatigalugit – kommunit nuna tamakkerlugu eqqagassalerinermi aaqqiissutissamut, kommunit suleqatigiiffigisaannut, aammalu eqqakkanik nuna tamakkerlugu eqqakkanik ikuallaavissuarni ikuallaaviusartumut peqataanissaat aaqqiissutissanit pitsaanerpaasoq. Ammaannartumik ikuallaasarneq aaqqiissutissani kingullerpaasariaqarpoq, aammalu ammaannartumik ikuallaasarnerit atorunnaarnissaat uteriilluta sulissutigisariaqarparput.”
Ammaannartumik ikuallaasarneq inerteqqutaavoq aaqqiissutaasussaananilu
Ammaannartumik ikuallaasarneq eqqagassalerinermut maleruagassanik arlalinnik unioqqutitsineruvoq, taakkununngalu Avatangiisit innarlitsaaliorneqarnissaannik Inatsisartut inatsisaanni nr. 9-mi, 22. november 2011-meersumi (Avatangiisinut inatsit) § 35, imm. 1, kiisalu Eqqakkanut nalunaarummi § 9, § 35 aamma § 37, imm. 1 ilaatinneqarput.
Ilisimatitsissutigineqassaaq, 2023-mi maajip qiteqqunnerani nunatsinni kommunit tamarmik allakkanik nassiussiffigineqarsimammata. Allakkami ammaannartumik ikuallaanissaq inerteqqutaasoq, aammalu kommunini sumiiffinni arlalinni eqqakkanik ammaannartumik ikuallaasoqartartoq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit ilisimaneqartoq erseqqissaatigineqarpoq. Taamaallaat ammaannartumik nakkutigisamillu ikuallaasoqarsinnaavoq, Naalakkersuisut qaqutigoortumik pisartutut eqqakkanik ikuallaanissamut immikkut ittumik akuersissuteqarsimappata. Kommunit arlaannaalluunniit maannarpiaq taamatut ammaannartumik ikuallaanissamut immikkut ittumik akuersissummik tunineqarsimanngillat.
”Kommunit eqqagassalerinermik ajornartorsiuteqarneranut ikiorniarlugit ukioq manna ESANI A/S-ip nuna tamakkerlugu eqqakkanik katersuinissaanut 3 millioner koruuninik neriorsuummik tunniussisoqaqqippoq. Nuna tamakkerlugu ikuallaaviit suli piariinngillat, kisiannili eqqakkat katersorneqartut Danmarkimi isumagisassanngorlugit nassiunneqartussaapput. Maanna kommunit akisussaaffitsik ilisimalertariaqarpaat ajornartorsiutaasullu suliniutigisariaqarlugit. Eqqakkat peernissaannut periarfissanik peqareerpoq”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Nakkutigisamik ammaannartumik ikuallaanissamut Naalakkersuisut qaqutigoortumik pisartutut immikkut ittumik akuersissuteqassappata, ikuallaanermut illersuutissanut sukumiisunik piumasaqaateqartoqartarpoq, ikuallaanermi inuit pinngortitarlu ajoqusernissaannut ulorianartorsiorneq annertusisarmat.
Annertunerusumik paasisaqarusunnermi:
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisup allattaa Manasse Berthelsen oqarasuaat: +299 34 56 03 / 54 88 68-imut imaluunniit: mabr@nanoq.gl imaluunniit pan@nanoq.gl aqqutigalugit attaveqarfigineqassaaq.