AtuartigukKNAPK ataatsimiinnissanut aggersarneqartarpoq
Nassiussisuuvoq: Aalisarnermut Piniarnermullu NaalakkersuisoqarfikAalisarnermut Piniarnermullu Naalakkersuisoqarfiup uppernarsarsinnaavaa KNAPK ataatsimiinnermut peqataasarsimanngitsoq, naak kattuffik ataatsimiinnermut aggersarneqartaraluartoq, Aalisarnermut Piniarnermut Naalakkersuisoq Karl Tobiassen oqarpoq.
KNAPK Sermitsiaq.AG-imut tallimanngornermi juulip 21-anni 2023-mi oqarpoq KNAPK aamma SQAPK Namminersorlutik Oqartussat Naalakkersuisoqarfiinit aalisarnerup iluani suliffissaqartitsineq ilinniartitaanerlu pillugit nalunaarusiap suliarineqarneranut atatillugu aggersarneqarsimanatik. Nalunaarusiaq taaguuteqarpoq: Aalisartoqarnerup iluani suliffeqarneq aamma ilinniartitaaneq.
“KNAPK-p aamma SQAPK-p maluginiarpaat suleqatigiissitamut nalunaarusiamik suliarinnittussatut pilersinneqarsimasumut ilaasortaatinneqarsimanatik naak suleqatigiissitamut suliassat allattorsimaffianni allassimasoqaraluartoq, aalisarnermik inuussutissarsiuteqartut sisamanik sinniisuutitaqassasut.” KNAPK-ip siulittaasua Nikkulaat Jeremiassen Sermitsiaq.AG-mut oqarpoq. Nangillunilu: “Aamma erseqqissaatigaat peqatigiiffik pilersinneqaqqammersoq QAK ,Qalerualinniat Aalisagarniallu Kattuffiat, Henrik Sandgreen siuttoralugu suleqatigiissitamut peqataasimasoq.
Erseqqissarusuppara Aalisarnermut Piniarnermullu Naalakkersuisoqarfiup uppernarsisinnaammagu nalunaarusiornissamut KNAPK arlaleriarluni aggersarneqartarmat, KNAPK-li ataatsimiinnermut peqataaneq ajorpoq. Aalisarnermut Piniarnermullu Naalakkersuisoqarfiup KNAPK-mut e-mailikkut apeqquteqartarpoq nalunaarusiassamut ilanngussaqassannginnersoq – akinngisaannarporli. KNAPK ataatsimiinnernut ilaaneq ajormat e-mailikkullu aamma akineq ajormat akuutissallugu ajornakusoortorujussuuvoq, Karl Tobiassen erseqqissaavoq.
KNAPK-ip aamma SQAPK-ip aamma tikkuarpaat aalisarneq pillugu inatsisissamut nutaamut inatsisissatut siunnersuummi naammattumik, soorlu ilaatigut ukununnga isummertoqarsimanngitsoq: Sinerissap qanittuani aalisarfiusup 3 sømilimiit 12 sømilimut avalatsinneqarnissaa, Kalaallit Nunaata imartaata tamarmi aqutsiveqarfinngortinneqanissaa aamma sinerissap qanittuani aalisagartassat amerlinissaat.
Erseqqissarusuppara inatsisissatut siunnersuummik maannakkut piareersimasoqanngimmat. Inatsisissap piareersarneqarnera malittarisassat naapertorlugit suliarivarput. Aalisarneq pillugu Ataatsimiititaliarsuup isumaliutissiissutaa pillugu marloriarluta, tassalu Nuummi Ilulissanilu isumasioqatigiissitsivugut, taakkununngalu SQAPK aamma KNAPK peqataapput isummaminnik annissueqataallutik. Inatsisissap suliarineqarneranut tullinnguuttoq tassaavoq isumasioqatigiissitsinermi isummat, kiisalu partiit oqaloqatigisaarnerini isummat katersussallugit, inatsisissamut tulluussassallugit. Inatsisissatut siunnersuut piareerneqarpat, tusarniutigineqassaaq, kikkunnit tamanit akissuteqarfigineqarsinnaasoq.
Pissusissamisoorsorinngilara tusagassiuutitigut tikkuartuutissalluni, kissaatiginerullugulu oqaloqatigiinnikkut paaseqatigiissinnaaneq.
Attavigineqarsinnaavoq Aalisarnermut Piniarnermullu Naalakkersuisoqarfik. APN@nanoq.gl