Greenland Mineralsip Namminersorlutillu Oqartussat akornanni Isumaqatigiissitsiniaanermi suliaq ingerlasoq.

Aningaasaqarnermut, Aatsitassanut, Inatsisit Atuutsinneqarnerannut, Naligiisitaanermullu Naalakkersuisoq, Naaja H. Nathanielsen Greenland Mineralsip Namminersorlutillu Oqartussat akornanni isumaqatigiissitsiniaanermi suliaq ingerlasoq pillugu imak oqaaseqaateqarpoq:

Isumaqatigiissitsiniaanermi suliamut maanna ingerlasumut tunngatillugu, suliaq isumaqatigiissitsiniartarnermi eqqartuussivimmut suliassanngortinneqarsinnaanngitsoq, Naalakkersuisut erseqqissumik isumagaat. Uagut isitsinnit isigalugu Isumaqatigiissitsiniarnermi eqqartuussivimmi isumaqatiginninniarnerit taamaallaat isumaqatigiissitsiniarnermi eqqartuussiviup suliami aalajangiinissami piginnaatinneqannginneranik aalajangersarnissaanut tunngavoq.

Suliffeqarfik aatsitassamik piiaasinnaanermut akuersissummik tunineqarnissamik pisinnaatitaaffeqarnersoq suliami qitiuvoq. Isumaqatigiissitsiniartarnermullu immikkut piumasaqaat suliffeqarfiup innersuussutigisaa, isumaqatigiissitsiniartarnermi eqqartuussivimmi isumaqatigiinngissutinik tunniussisinnaanermut toqqammavik, aalajangiinernut allaffissornikkut inatsisinik naliliinernut taamaallaat tunngassuteqarpoq. Aamma aatsitassanut inatsit naapertorlugu akuersissummik nalunaarutigineqarnernut aalajangernerit, ingerlatsiviup tunngavissat assigiinngitsut arlallit oqimaalutarlugit naliliinerunerai.

Alloriarneq tulleq
Isumaqatigiissitsiniarnermut eqqartuussivik kisimi nammineq suliami aalajangiisinnaanermut pisinnaatitaaffeqarnerminik aalajangersinnaavoq. Taamaammat suliami apeqqut taanna pillugu aalajangertoqarnissaata tungaanut suliaq isumaqatigiissitsiniarnermut eqqartuussivimmi ingerlattariaqassavarput.

Ulloq 19. juli 2023 suliffeqarfimmit suliassanngortitsinermut allakkiaa, ingerlatseqatigiiffiup inaarutaasumik isummiussaanik imaqartut tiguagut. Naalakkersuisut ulloq 8. januar 2024 tungaanut akissuteqarnissamut piffissaqarput. Suliassanngortitsinermulli allagaq qanorluunniit ikkaluarpat, isumaqatigiissitsiniarnermut eqqartuussivik suliami eqqartuussinissamut piginnaatitaanngitsoq, Kalaallillu Nunaanni Namminersorlutik Oqartussanut suliassanngortitsinerit eqqartuussivinni ingerlanneqartariaqartut Naalakkersuisut aalajangiusimavaat.

Taarsisussaatitaaneq
Uran pillugu inatsimmik akuersineq aatsitassanut inatsit naapertorlugu akuersissutaatillit taarsiivigineqarnissamik piumasaqarnerannik kinguneqarsinnaasoq Naalakkersuisut ilisimajuaannarpaat. Taamaattoq inatsisip arsaarinninnermut inatsisaannginnera, eqqartuussiviullu inatsisit malillugu aalajangernerit arsaarinninnerunerannik inerniliinerani inatsit atorneqassanngitsoq, inatsimmut nassuiaammi ersarissumik sukumiisorujussuarmillu allassimavoq. Taamaammat uranimik inatsit malillugu aalajangernerit kingunerannik taarsiivigeqqunerit akuerineqarsinnaasariaqanngillat.

Ilimagisaqarnissamut tunngavissaqarneq
Greenland Minerals A/S qalluisinnaanermut akuersissummik tunineqarnissamik ilimagisaqarnissamut pisinnaatitaaffeqarluni isumaqarpoq. Ilaatigut Naalakkersuisut qallunaat oqartussaasui peqatigalugit Kalaallit Nunatsinni uranimik qalluinissamik ajornarunnaarsitsisumik, malittarisassanik toqqammavissanik pilersitsiniarnermik suliaqarsimanerat innersuussutigineqarpoq.
Taamatut suliaqartoqarsimanera, malittarisassanillu toqqammavissanik Kalaallit Nunaanni uranimik qalluisinnaanermik ajornarunnaarsitsisumik suliaqartoqarsimanera ilumoorpoq. Suliffeqarfilli piffissami sumiluunniit qalluisinnaanermut akuersissummik tunineqarsinnaanerminut tunngavissaqartumik ilimasussinnaanerminik oqarsinnaasimanngilaq. Suliffeqarfiup suliap ingerlanera tamakkerlugu ujarlernissamut akuersissutertik malillugu qalluisinnaanermut akuersissummik nalunaarfigineqarnissamut pisinnaatitaaffeqarnani ilisimajuarpaa.

Qallunaat naalagaaffiannut attuumassuteqarneq
Kalaallit Nunaanni Namminersorlutik Oqartussat qallunaallu naalagaaffiata, qallunaat naalagaaffiata suliami akuunnginnera piffissaq tamaat isumaqatigiissutigiuarpaat, aatsitassanummi oqartussaaffik Namminersorneq pillugu Inatsit naapertorlugu tiguneqareermat.
Kalaallit Nunaanni Namminersorlutik Oqartussat qallunaallu naalagaaffiata akornanni taarsiisussanngortitaanermik pisussaaffimmik pilersoqartillugu aningaasartuutit agguarneqarnissaannik isumaqatigiissuteqartoqanngilaq, aatsitassanulli immikkoortup tiguneqareernera pissutigalugu, Kalaallit Nunaanni Namminersorlutik Oqartussat kisimik taarsiisussaatitaanissaat pissusissamisuussaaq.

Uran pillugu inatsit suliamut aalajangersimasumut tunnganerarlugu kingumoortumillu atuutilernerarlugu oqaatigineqartarpoq
Uran pillugu inatsit aatsitassanut inatsit malillugu akuersissutaatilinnut tamanut atuuppoq, akuersissutaatilinnullu assigiimmik atuulluni.
Uran pillugu inatsit kingumoortumik atuutilersitaanngilaq, akuersissutinulli inatsisip atuutilernerata kingorna nalunaarutigineqartunut taamaallaat atuulluni. Assersuutigalugu Greenland Minerals A/S inatsisip atuutilernera sioqqullugusulli ujarlernissamik akuersissutertik malillugu suli uranimik ujarlersinnaatitaapput. Suliffeqarfilli uranimik piiaanissamut akuersissummik tunineqarsinnaanngilaq.

Paasissutissanik annertunerusunik piniarnermi attaveqarfigineqassaaq naalakkersuisoqarfimmi pisortaaneq Jørgen T. Hammeken-Holm e-mail joeh@nanoq.gl imaluunniit oqarasuaat +299
346846