Arctic Umiaq Linep 2024-mi angalanissamut pilersaarutaa tikitassat amerlinissai ilaasullu pitsaanerusumillu angallanneqarnissaannik ilaneqarput

Sisamanngornermi 13. juli 2023-mi Ineqarnermut Attaveqaasersuutinullu Naalakkersuisoq ataatsimeeqateqarpoq, tamatumani Aningaasaqarnermut Akileraartarnermut aamma Sanaartornermut Ataatsimiititaliat ataatsimiigiaqquneqarsimallutik. Ataatsimiinnermi siunertarineqartoq tassaavoq Arctic Umiaq Linep siunissami angalasarnissaanik pilersaarut tikitassallu ilanissaat periarfissaanerusut. Ataatsimiinnermi aamma Arctic Umiaq Linep pisortaa, Jens-Jakob Sandgren, umiarsuaatileqatigiiffimmi maannakkut suliat pillugit ilisimatitsisoq ataatsimeeqataavoq.

Naalakkersuisoq Erik Jensen oqarpoq:

”Tikitassat amerlanerusut Arctic Umiaq Linep angalanissaanut pilersaarutaanut ilanngunneqarnissaat sivisuumik kissaatigisimavara. Taamaattumik Arctic Umiaq Linemit maannakkut 2024-mi angalanissanik siunnersuummik saqqummiussaqarpoq, tamatumani angalanissanut pilersaarummut tikitassat amerlanerujussuit ilanngunneqarlutik, tikitassat Kujataani Nanortalimmiit Avannaani Uummannamut. Arctic Umiaq Linep innuttaasutta ilarpassuinik inoqarfinni mikinerusuni najugaqartunik tassungalu tunngatillugu nunami innuttaasut takornariallu nunatsinni kusanartumik sumiiffinnik arlalinnik takusaqarnissamut misigisaqarnissamullu periarfissillugit sullissinnaalerpai.

Nuannaarutigeqisannillu ilisimatinneqarpunga Arctic Umiaq Line Upernavimmut aammalu Uummannap Upernaviullu akornanni 2024-mi, angallassinissamik pilersaarummik immikkut aamma suliaqarmat. Tamannalu kingusinnerusukkut pilersaarut saqqummiunneqarnissaa nalunaarutigineqarumaarluni.”

Ataatsimiinnermi Aningaasaqarnermut Akileraartarnermut Ataatsimiititaliaq kiisalu Sanaartornermut Ataatsimiititaliami ilaasortanit Arctic Umiaq Linep angalanissaanik pilersaarutaani inoqarfiit mikinerusut ilanngunneqarnerat tapersersorpaat. Taamaattumik Arctic Umiaq Linep pisortaata 2024-mut angalanissanik pilersaarutit saqqummiussinnaammagit nuanneqaaq, pilersaarutinut Nanortalimmiit Uummannaq tikillugu angalanissat ilaatinneqarmata. Ukua tikinneqartarnissaat pilersaarutaavoq: Nanortalik, Qaqortoq, Narsaq Arsuk, Paamiut, Qeqertarsuatsiaat, Nuuk, Maniitsoq, Kangaamiut, Itilleq, Sisimiut, Attu, Kangaatsiaq, Aasiaat, Qeqertarsuaq, Ilulissat, Qasigiannguit aamma Uummannaq.

Angalanissanik pilersaarut annertusisaq amerlanerusunik tikitassaqarlunilu isorartuneruvoq tamannalu soorunami angalanerni sunniuteqartarumaarpoq. Ullumikkut Arctic Umiaq Linemi angalanissanik pilersaarutit sapaatit akunnikkaartumik utikajaartuarput, tamatumani Sarfaq Ittuk sapaatit akunnerata ingerlaneranni avannarpasinnerpaamiit kujasinnerpaamut tikitassaq avannarpasinnerpaaq kujasinnerpaarlu tikittarpai. Siunissami Sarfaq Ittuk aamma sapaatit akunnerinik marluinnik sivisussuseqartumik uteqattaartarnissaa pilersaarutigineqarpoq. Tassa imaappoq Sarfaq Ittuup tikittarneri akuttussasut, akerlianilli umiarsualiviit amerlanerit tikinneqartalissapput.

Angalanissamik nutaamik pilersaaruteqalernermi iluaqutissat tassaassapput tikitassani toqqakkani ilaasut nunaliarsinnaalernissaat, niutik siaarsinnaalissavaat najukkanilu neriniartarfinni nerisassallutik, unnuisinnaallutik aamma sumiiffimmi arlaannik eqqumiitsunik takuniaasinnaallutik. Taamaalillutik najukkani namminersorlutik inuussutissarsiuteqartut misigisassanik il.il. aaqqissuussinissaminnut periarfissaqalissapput.

Naalakkersuisup Erik Jensenip aamma Inatsisartut Ataatsimiititaliaannik ataatsimeeqateqarneq illua´tungeriit isummersuutiminnik paarlaasseqatigiinnissaminnut aamma siunissami Arctic Umiaq Linep ingerlalluarnissaanik kissaassinissamut periarfissaqarsimavoq. Ilaasut pisariaqartitaat illoqarfiit nunaqarfiillu amerlanerit tikikkuminassusiat pitsanngorsarneqarnissaat siunertaavoq, tamannalu ilutigalugu takornariat amerlisinnaapput nunallu immikkoortuini aningaasatigut ineriartortitsisoqarsinnaalluni.

Arctic Umiaq Linemi 2023-mi misilittagaqareersimavoq, tassa ukiaru taanna tikitassat tullinnguuttut makku ilanngunneqarmata: Itilleq (Igaliku), Narsarsuaq, Narsaq, Kangaatsiaq, Qasigiannguit, Uummannaq aamma Upernavik.

2024-mut inniminniinissamut septemberip qaammataata ingerlanerani ammarumaartoq Arctic Umiaq Linemit paasissutissiissutigineqarpoq.

Maannakkut siunissamilu angallassinissat aamma akit pillugit paasissutissanik amerlanerusunik pissarserusukkaanni Arctic Umiaq Linep nittartagaa innersuussutigineqarpoq www.aul.gl.

Paasisaqarnerorusukkuit Ineqarnermut Attaveqaasersuutinullu Naalakkersuisoqarfik box909@nanoq.gl-mut attavigiuk.