Peqqinnissaqarfimmik aaqqissuusseqqinneq nutaaq pillugu isumasioqatigiinnissamut partiit qaaqquneqarput

Pingasunngornermi ulloq 2. august peqqinnissaqarfimmik aaqqissuusseqqinnissaq pillugu ulloq naallugu isumasioqatigiinnissamut Inatsisartuni partiit tamaasa Naalakkersuisunit qaaqquneqarput. Tassani juunimi partiinik aallarniutaasumik ataatsimeeqateqarnermi siullermeertumik saqqummiunneqartumik Peqqissutsimut Naalakkersuisup, Mimi Karlsenip, aaqqissuusseqqinnissamut siunnersuutini itisilissavai.

Mimi Karlsen oqarpoq:
”Juunimi pitsaasumik aallarniutaasumik ataatsimeereerluta maannakkut peqqinnissaqarfimmik aaqqissuusseqqinnissap tungaanut alloriarpugut. Piffissaq qaninnerusoq eqqarsaatigalugu, soorlu ukiup ataatsip ingerlanerani peqqinnissaqarfimmi pinasuartumik amigaateqarnermik pitsanngorsarneqartussanik kiisalu piffissaq ungasinnerusoq eqqarsaatigalugu peqqinnissaqarfimmik tamarmiusumik aaqqissuussaanikkut nukittorsaataasussanik aaqqissuusseqqittoqassaaq."

Peqqinnissaqarfimmik aaqqissuusseqqinnermut aningaasatigut killiliussat pingaarnerit kiisalu aaqqissuusseqqinnermi immikkoortut ataasiakkaat isumasioqatigiinnermi itisilernerunissaat periarfissaavoq. Taamaattumik isumasioqatigiinnerup aallartinnginnerani aaqqissuusseqqinnermut siunnersuutaasa kissaataasalu aningaasaqarnikkut naatsorsuusiorfigineqarnissaat kissaatigippassuk Peqqissutsimut Naalakkersuisoqarfimmut saaffiginneqqullugit Mimi Karlsenip partiit kajumissaarpai. Partiit tamarmik aaqqissuusseqqinnermut kissaatitik pillugit isumasioqatigiinnermi saqqummiinissaminnut periarfissaqarumaarput.

”Naalakkersuisut peqqinnissaqarfitsinnut suli annerusumik aningaasaleerusukkaluarlutik aningaasaqarnikkut periarfissavut killeqarput. Aalajangiinnginnitsinni suliniutini assigiinngitsuni peqqissaartumik aningaasartuutissat misissuiffigeqqissaassagullit pisariaqarluinnarpoq. Taamaattumik partiit siunnersuutaasa tusarnissaannut assut qilanaarpunga” Mimi Karlsen oqarpoq.

Ulloq 2. august internetikkut ulloq naallugu isumasioqatigiittoqassaaq.

Sukumiinerusumik paasisaqarniaruit naalakkersuisup allattaa Naja Lynge-Petersen nalp@nanoq.gl-ikkut attavigiuk