Ilinniartitaanerup aalisarnerup ineriartornera tapersersussavaa

Naalakkersuisut aalisakkanik tunitsivinni sulisoqartarneq aamma taakkunani ilinniartaaneq pillugu nalunaarusiaq akuersissutigeqqammerpaat. Aalisarnerup qularnaatsumik ineriartortuarnissaa pillugu nalunaarusiami innersuussutigineqartut ukiuni tulliuttuni timitalersorneqassapput.

Nalunaarusiaq suleqatigiissitamit suliarineqarpoq, taanna aalisakkerivinni sulisoqarnermut aamma ilinniartitaanermut tunngasunik suliaqartarpoq. Suleqatigiissitaq naalakkersuisoqarfinnit, aalisakkerinermik suliaqartunit, kommuninit, SIK-mit aamma ilinniarfinnit aalisakkanut attuumassutilinnit inuttaaffigineqarpoq. Innersuussutini pingaarnertut anguniarneqarluni qulakkeerniarneqarpoq nunatsinni siunissami aalisakkerisut tassaassasut nunaqavissut, tamani pingaarutilinnik atorfeqartut. Tamannalu Naalakkersuisunut pingaaruteqarpoq anguniagaallunilu.

Nalunaarusiami ilaatigut siunnersuutigineqarpoq pisariaqartitsineq naapertorlugu ilinniagassamut pilersaarusiortoqarsinnaasoq, tamatuma qulakkiissallugu ilinniagarilerniakkamut ukkassisoqarnissaa, aalisarnerup pisariaqartilluinnarmagu ilinniarsimasunik sulisoqarnissaq. Aamma innersuussutigineqarpoq siunnersuisoqatigiinnik pilersitsisoqassasoq, taanna aalisartunit aamma ilinniarfinneersunit ilaasortaaffigineqassalluni.

Innersuussutit ilaat tassaavoq nunatsinni ilinniarneqarsinnaasorpassuit pitsaanerusumik tamanut ilisimatitsissutigineqartarnissaat aamma atorfeqarnermi ineriartornissamut, soorlu qaffakkiartornissamut, nunatsinni periarfissat pioreersut pillugit ilisimatitsissutigineqartarnissaat.

Nalunaarusiammi takutippaa ilinniarfiit qassiit amerlanngitsunik ilinniartoqalersartut, inuussutissarsiortullu nunaqavissunik ilinniarsimasunik sulisoqassallutik noqqaasartut.

Nalunaarusiaq Naalakkersuisut.gl-imi saqqummersitani atuarneqarsinnaavoq.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl