Piniakkanik piniarnermi pitsaasumik ileqqorissaarnissaq Aalisarnermut piniarnermullu Naalakkersuisoqarfiup kaammattuutigaa

Inuinnaat nittartakkakkut oqallittarfii aqqutigalugit Aalisarnermut Piniarnermullu Naalakkersuisoqarfiup (APN) paasivaa puisi sikumi qassimasoq piniartunit akornusersorneqartoq puffassaarneqartorlu.
Tamatumunnga atatillugu APN-ip kaammattuutigissavaa piniakkat piniarneqanngippata akornusersorneqartassanngitsut.

Namminersorlutik Oqartussat puisit illersugaanerat piniagaanerallu pillugit nalunaarutaa naapertorlugu puisit akornusersorneqaqqusaanngillat. Aammattaaq Nunatta avataaniit isigineqarnera innarlerneqarsinnaavoq taamaattunik pisoqartillugu.

Piniarneq pillugit Siunnersuisoqatigiinnit ataavartumik kaammattuutaavoq piniarnermi ileqqorissaarnissaq, uunga ilanngussatut ilanngunneqarpoq Piniarneq pillugu Siunnersuisoqatigiit kaammattuutaat.

Sukumiinerusumik paasisaqarusukkaanni Immikkoortortami pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl

KALAALLIT NUNAANNI PINIARNERMI ILEQQORISSAARNEQ

Piniarnermi eqqaamasassat:

1. Inatsisit atuuttut malikkit - Piniarneq tamarmi inatsisit atuuttut naapertorlugit ingerlanneqassaaq. Taamaattumik piniarnissamut piffissaliussat, nunat piniarfissat pisassiissutillu atuuttut paasiniakkit, aamma illit kommunerisavit iluani aalajangersarneqartut. Nunat eqqissisimatitat timmiaqarfiillu eqqaanniittut sumiiffiit timmissanik illersuiffiusut ataqqikkit, timmissat eqqissillutik piaqqisinnaaqqullugit taamaalillutillu amerliartorsinnaaqqullugit.

2. Aallaammik piniakkannut naleqquttumik atugaqarit, pissaanaveersaarit ungoorinallu - Uumasup pisariaqanngitsumik naalliutsinneqannginnissaa piniarnerup nuannersuuneranut ilaavoq. Taamaattumik aallaasini sulloqqortussutsip eqqortup atorneqarnissaa pingaaruteqarpoq, isumannaatsumillu ungasippallaanngitsumiit seqqortuaannartarit. Uumasut pissanneqassanngillat aattukkavillu assartornissaa qanillisarniaannarlugu ungoorissanngilatit.

3. Pisatit tigusinnaasatillu tamaasa tigusassavatit - Nunatsinni inoqutigiinnut, atisanut aamma eqqumiitsuliornikkut atortussiassanik atuinitsinni uumasup tamarmiusup atorneqarnissaa ileqqoraarput. Taamaattumik pisaqaruit neqaa allallu nerineqarsinnaasut, atorneqarsinnaasullu allat tamakkerlugit nassartakkit. Taamatut ililluta nunatsinni pisuussutit uumassusillit atorluarnerussavagut.

4. Aallaat misissoqqaaruk ooqattaatigineranilu inuit, illut il.il. sissuikkit Piniariarlutit aallannginninni sakkutit misissoqqaakkit. Aallaasivit piniagassanut atorneqartinnagu ooqattaatigineqarsimanissaa qularnaaruk. Uumasup seqqugassavit tunuani inoqarnersoq misissoqqaartuaannassavat. Inuit allat, inissiat, angallatit allallu tungaannut aamma illoqarfiup iluani seqqunngisaannarit.

5. Uumasut pisatit tamatigut nalunaarsortakkit - Uumasut pisarisatit pillugit tamatigut allattuijuaannartarit taamaalillutit piniarnermut allagartat nutarterneqartussanngorpat ukiumoortumik immersugassat ajornannginnerusumik immersorsinnaaqqullugu. Piniagassat killilersukkat tamaasa pillugit pisanik immikkut nalunaarsuiffissaq immersoruk utertillugulu, taamaalilluni piniagassaqassutsit ineriartorneri pillugit Naalakkersuisoqarfik sapinngisamik pitsaanerpaamik ilisimasaqalersillugu.