Nunani avannarlerni imartat pisuussutaasa piujuarnissaat tapersersorneqarluarput

Nunani Avannarlerni Ministerit Siunnersuisoqatigiiffiat ukiumoortumik ataatsimiimmat immap pisuussutaat, inuussutissat ataqatigiissumik aaqqissuussaanerisa qajannaatsumik isumagisaalluarnissaat aamma nunani avannarlerni nerisassat ataqatigiissumik aaqqissuussaaneri ataatsimoorluni tamaviaarunneqarnissaat oqaluuseraat.

Aalisarnermut Piniarnermullu Naalakkersuisoq Karl Tobiassen Nunani Avannarlerni Ministerit Siunnersuisoqatigiiffiat Islandimi, Keflavikkimi juunip 21-anni 2023-mi ataatsimiimmata peqataavoq.

Ataatsimiinnermi oqaluuserineqartut tassaapput inuussutissanik pilersuinerup qularnaatsuunissaa aamma inuussutissat ataqatigiissumik aaqqissuussaanerisa qajannaatsumik isumagisaalluarnissaat, aamma nunani avannarlerni imartat pisuussutaasa piujuarnissaasa siuarsarnissaat. Aalisarnermut Piniarnermullu Naalakkersuisup immammi isumalluutit aamma aalisarneq ukkatarineqarnissaat tikkuarpai, erseqqissaallunilu taakku Nunani Avannarlerni inuussutissanik tunisassiornermut tapertaalluarmata.

Ministerit aamma oqaluuseraat nerisassanik eqqaasarneq aamma inuusuttut inuussutissanik tunisassiornermi amigaataaneri. Taakku Nunani Avannarlerni qanoq aaqqiivigineqarsinnaaneri pillugit oqaluuserinnittoqarpoq. Aalisarnermut Piniarnermullu Naalakkersuisup nunatsinni inuusuttut inuussutissanik tunisassiornermi amigaataaneri pingaartutut erseqqissaassutigaa.

Ataatsimiinnermi pingaarnertut oqaluuserineqartoq tassaavoq 2025-2030-mut suleqatigiinnissamut pilersaarutip nutaap immersornissaanut oqaluuserinninneq. Taanna Nunani Avannarlerni Ministerit Siunnersuisoqatigiiffiata 2025-2030-mut sulineranut tunngavigineqassaaq.

Pilersaarut oqaluuserineqarmat Aalisarnermut Piniarnermullu Naalakkersuisup oqaatigaa immamit isumalluutit, imartatta inuussutissanik tunniussaqartarnera kiisalu pilersorneqarnerup isumannaatsuunissaa pingaaruteqartoq. Taakku Nunani Avannarlerni imartat pisuussutaasa inuussutissat ataqatigiissumik aaqqissuussaanerisa annerusumik qajannaatsumik isumagisaalluarnissaannut pingaaruteqarmata.

Nunani Avannarlerni Ministerit Siunnersuisoqatigiiffiat Keflavikkimi ataatsimiinnerannut atatillugu Aalisarnermut Piniarnermullu Naalakkersuisoq Nunani Avannarlerni nerisaqartarnerup aaqqissuunneqartarnissaanut innersuussutaat pillugit (NNR 2023) arfinilissaannik saqqummersitsinerinut peqataavoq. Nunani Avannarlerni nerisaqartarnerup aaqqiissuunneqartarnissaannut innersuussutit pillugit, Nunani Avannarlerni inuussutissanik innersuussuteqartartuupput. Nerisassat innersuussutigineqartut Nunani Avannarlerni aamma nunani baltiskiusuni nerisassat pillugit sinnersuisooqatigiivisa nunani namminermi inuussutissat pillugit siunnersuisoqatigiiusuni sulinerit tunngavilertarpaat.

NNR-imit innersuussutigineqartut ilisimatusartut hundredet arlallit ukiorpassuarni suleqatigalugit ineriartortinneqarput. Inuussutissat avatangiisinit aamma silap pissusiata allanngoriartorneranit sunnerneqarsimanissaat aatsaavissuaq naatsorsuutigaat, peqqinnartumik nerisaqarnissamut siunnersuusiornerminni tamanna oqaatigineqarluni. Ataatsimiinnermi innersuussutigineqartut oqaluuserineqartullu ilisimatitsissutitut pineqarput.

Pisarneq naapertorlugu siulittaasoqarfik nunamut allamut isumagisassanngortinneqarpoq, Sverige Nunani Avannarlerni Ministerit Siunnersuisoqatigiivi 2024-mit siulersorneqassaaq.

Attavigineqarsinnaavoq: Aalisarnermut Piniarnermullu Naalakkersuisoqarfik. APN@nanoq.gl

Nunani Avannarlerni Ministerit Siunnersuisoqatigiiffiat pillugu paasissutissat

Nunani Avannarlerni Ministerit Siunnersuisoqatigiiffiat nunani avannarlerni naa-lakkersuisut pisortatigoortumik suleqatigiiffigaat. Nunani Avannarlerni Ministe-rit Siunnersuisoqatigiiffianni suleqatigiinneq naalakkersuinikkut ingerlanneqar-poq, nunanilu avannarlerni naalakkersuinikkut ingerlataqartunut ingerlatsivin-nullu tunngasuulluni.

Nunani Avannarlerni Ministerit Siunnersuisoqatigiiffianni suliaqarfinni qulini ministerit siunnersuisoqatigiiffeqarput.

Naalakkersuisut suliaqarfinni ministerit siunnersuisoqatigiiffiini qulini tamani aamma suleqatigiinnermut ministerit siunnersuisoqatigiffianni (MR-SAM) peqa-taapput, Namminersorlutik Oqartussat tassani qinersinerup Naalakkersuisunillu toqqaanerup kingorna Nunani avannarlerni suleqatigiinnermut Naalakkersuisu-mit sinniisuuffigineqarput.

Aalisarnermut Piniarnermullu Naalakkersuisoq aamma Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoq sulia-qarfimmi ministerit siunnersuisoqatigiiffianni MR-FJLS-imi Kalaallit Nunaannit sinniisuupput.

MR-FJLS ministerit siunnersuisoqatigiiffigaat politikkikkut immikkoortunik sisa-manik sammisaqarfiusoq; Aalisarneq immamilu tukertitsiveqarneq, Nunalerineq, Inuussutissalerineq aamma Orpippassualerineq. MR-FJLS Nunani Avannerli ministeriaqarfiit 20-t suleqatigiiffigaat.

MR:FJLS-ip suliassaa pingaarneq tassaavoq pinngortitami uumassuseqartullu sananeqaasiini pisuussutit inuit inuunerannut pisariaqartut piujuartitsilluni ator-neqarnerisa siuarsarnissaa. MR-FJLS-ip nerisassat pitsaasuunerannik tatiginnin-nissap pissarsiarineqarsinnaanerisalu qulakkeerneqarnissaa, nunani avannarlerni innuttaasut peqqinnerunissaannut tapersiisunik nerisaqartarnerup siuarsarnissaa aamma nunani avannarlerni nerisassiassani nerisaqartarnermilu periarfissat ineri-artortinnissaat sulissutigai. Ministerit siunnersuisoqatigiiffianni sulinermi immik-koortoq pingaartoq tassaavoq ilisimatusarnerup ineriartortinerullu suliamut attuu-massuteqartut pitsanngornissat siuarsarnissaallu.

Aalisarnermik suliaqarnermi ilaatigut aalisarnerni pinngortitami ataqatigiinnerup mianerineqarnissaa pillugu tunngavik erseqqissarlugu, inuussutissarsiummi tek-nologimik ineriartortitsineq siuarsarlugu sammineqartarput aammalu aalisakkat imami avatangiisini peqqinnartumiittut nerisassaanissaat suliniutigalugu uumas-susillit pijuartinneqarnissaat sammineqartinneqalersarpoq. Avatangiisinik miane-rinnilluni aningaasarsiornermi aamma imminut nappassinnaasumik aningaasa-qarnermi ilaatigut sinaakkutaasumik atugassaritinneqartut aalisakkanik tunisassiasiorfiit naleqartitsilersarnerannik annertusisitsisinnaasut sammineqar-tinneqalersarput. Inuit atugaasa imminut nappassinnaanerannik suliaqarnermi sinaakkutaasumik atugassaritinneqartut atugarissaarnermik qulakkeerinnissutaa-sinnaasut ineriartortinneqarnerat aamma sinerissani innuttaasut siunissami periarfissaasa ineriartortinneqarnerat siuarsarneqassapput.