Peqqinnissaqarfiup aaqqissuuteqqinneqarnissaa pillugu isumaqatiginninniarnerit aallarnerneqarput

Naalakkersuisut sapaatip akunnerani matumani peqqinnissaqarfiup aaqqissuuteqqinneqarnissaanut oqallinnerit isumaqatiginninniarnerillu aallartinnissaannut Inatsisartuni partiit qaaqqusimavaat.

Peqqinnissaq pillugu Ataatsimiititaliarsuup isumaliutissiissutaa maajimi tunniunneqartoq isumaqatiginninniarnerit aallartinneqarnissaannut pissutissaqalersitsisoq, Peqqissutsimut Naalakkersuisoq Mimi Karlsen oqarpoq:

”Peqqinnissaq pillugu ataatsimiititaliarsuup isumaliutissiissutaata innersuussutaatalu atuarnissaannut tamatta periarfissaqarsimalerpugut, taamaalillutalu suliamut ilisimasanik tunngavissaqarluarluta peqqinnissaqarfiup siunissaa eqqartorsinnaanngorparput. Taamaattumik partiit peqqinnissaqarfiup aaqqissuuteqqinnissaanut naatsorsuutaat kissaataallu pillugit aallarniutaasumik oqallinnissamut qaaqqusimavakka. Peqqinnissaqarfik siunissami qaninnerusumi ungasinnerusumilu qanoq pitsanngorsarsinnaanerlugu isumaqatigiissaagut."

Peqqinnissaq pillugu ataatsimiititaliarsuup peqqinnissaqarfimmi suliassaqarfinni arlalippassuarni, tassunga ilanngullugit sulisussarsiortarnermut, sulisunik attassinissaq, ilinniartitaanermut peqqissutsillu siuarsarnissaanut pitsanngorsaatissatut naleqqussaatissatullu innersuussutit 117-init ikinnerunngitsut saqqummiuppai.

Mimi Karlsen oqarportaaq:
”Peqqinnissaqarfiup aaqqissuuteqqinneranik partiit tamarmik peqataaffigisaannik isumaqatigiilluarnissarput iluatsikkumaartoq neriuutigaara. Ukiuni tulliuttuni amerlasuuni peqqinnissaqarfimmut suliassaqarfimmi patajaassuseq pisariaqartinneqassaaq, taamaalilluta peqqinnissaqarfitta ineriartortinnissaanut pitsaanerpaanik tunngaveqalerniassagatta.

Isumaqatiginninniarluni ataatsimiinneq siulleq sisamanngornermi 22. junimi ingerlanneqassaaq.

Sukumiinerusumik paasisaqarniaruit naalakkersuisup allattaa Naja Lynge-Petersen nalp@nanoq.gl-ikkut attavigiuk

Inussiarnersumik inuulluaqqusillunga
Med venlig hilsen

Mimi Karlsen
Peqqissutsimut Naalakkersuisoq