KNR-p juunip 14-ani 2023 allaatigisaanut erseqqissaassuteqarneq

Nunanut Allanut Inuussutissarsiornermut Niuernermullu Naalakkersuisup Vivian Motzfeldtip juunip 14-ani KNR-ikkut allaatigisami “Naalakkersuisut: Illersornissaqarfik nunatsinni ulloqartinneqartaleqqissanngilaq”-mik qulequtaqartumi apeqquteqarfigineqarnerminut oqaaseqaatimi erseqqissaassuteqarfiginissai kissaatigaa.

“Nunatsinni sakkutuujusinnaanermut misilitsinnerit aallarteqqinneqarsinnaanngortut juulip tallimaani 2022-mi allakkatigut taamanikkut Illersornissamut ministeriusoq Morten Bødskov ilisimatippara, sulilu tamaappoq.
Naqissuserlara Illersornissaqarfiup nunatsinni ulloqartinneqartaleqqinnginnissaanik oqaaseqarnera isumaqanngimmat sakkutuujusussaatitaanermut nunatsinni misilitsittoqartaleqqinnissaa unitsinneqassasoq, aamma Illersornissaqarfimmit neqeroorutigineqartumut Issittumi tunngaviusumik ilinniakkamut iserniarnermi misilitsittarnissamut taanna tunngammat.
Maani nunatta tungaaniit ilinniakkat sapinngisaq tamaat innuttaasunut tunngassuteqarnissaat Illersornissaqarfik suleqatigalugu sulissutigaarput. Ilinniarnerup kingorna innuttaasut akornanni ilinniakkap atorneqarsinnaanissaa ilinniarnertulli pingaaruteqartigisoq misilitsinnerup taama taaguuteqartinneqarnerata takutikkaa Naalakkersuisuniit isumaqarpugut. Taamaattumillu aamma sakkutuujunngitsut akornanni upalungaarsimanermut tunngasuni, illersornissamut sanilliullugu, amerlanerusunik ilinniarusullutik qinnuteqartoqartalernissaa kissaatigaarput.
Taamaattumik innuttaasut upalungaarsimanerannut ilinniarnerup kajuminnarsarnissaa illersornissamut ilinniarnermiit ukkatarineqarnerunissaa kissaatigaarput.
Piffissami najummatsernartumiippugut, issittumilu sakkuaattoqannginnissaanik kissaateqarluta. Tamannalu aamma avammut ersersissavarput.”

Taama Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt erseqqissaassuteqarpoq.

Paasissutissat sukimiinerusut pillugit saaffissaq:
Naalakkersuisup allattaa Naasunnguaq Beck Kristensen email: nabk@nanoq.gl tlf.: 345000