Utoqqaat pillugit suliassaqarfik inatsimmut ataatsimut katersorneqassaaq

Naalakkersuisut utoqqarnik suliassaqarfimmut inatseqarneq pillugu nassuiaammik suliaqarput. Nassuiaammi takuneqarsinnaavoq, siunissami utoqqarnik suliassaqarfimmi pisariaqartitat naammassiniarlugit, utoqqarnik suliassaqarfimmi inatsisit pioreersut nutarsarnissaannut pisariaqartitsisoqartoq. Tamatuma saniatigut utoqqaat pillugit inatsisit ataasiinnarmut katersornissaannut isumaliuutit aallarnersaataasut nassuiaammi paasisaqartitsipput.

Naalakkersuisut kissaateqarput utoqqarnik suliassaqarfimmi inatsisit inatsimmut ataatsimut katersornissaat. Tamanna allaqqavoq Naalakkersuisut Utoqqaat pillugit periusissiaanni suliniut nr. 1-imi: Utoqqaat pillugit suliassaqarfimmut inatsit ataatsimoortoq. Nassuiaat inatsisiliornermi killiffinni siulliuvoq aamma inatsisit atuuttut pillugit soqutigisaqaqatigiinnut paasisaqartitsisussaq.

”Utoqqartavut pillugit inatsisitigut pitsaanerusumik sinaakkuteqartariaqarpoq. Utoqqartavut pillugit sulineq ataatsimut samminerusumik ingerlanneqartariaqarpoq, Naalakkersuisut kissaatigaat utoqqaat pillugit inatsit ataaseq aqqutigalugu utoqqaat pillugit suliassaqarfik nukittorsartariaqartoq.” Isumaginninnermut, Suliffeqarnermut Nunamullu Namminermut Naalakkersuisoq, Jess Svane, oqarpoq nangillunilu:

”Naalakkersuisut innuttaasut inatsisiliornerup ingerlasarneranik paasitikkusuppaat. Nassuiaammi takutinneqarput utoqqaat pillugit suliassaqarfiup amigaatai, aamma peqatigitillugu Naalakkersuisut utoqqaat pillugit inatsisip qanoq isikkoqarsinnaaneranik aallarnisaataasumik siunnersuuteqarput. Soorunami ersarissartariaqarpoq, utoqqaat pillugit inatsit inaarutaasup angunissaanut amerlasuunik allannguuteqartussaammat.”

Utoqqaat pillugit inatsisissaq pillugu Isumaginninnermut, Suliffeqarnermut Nunamullu Namminermut Naalakkersuisoq, Jess Svane, oqaaseqarpoq: ”Utoqqaat pillugit inatsisip utoqqaat nutarsakkanik pisinnaatitaaffeqalersissavai. Utoqqaat pillugit inatsit malillugu pineqassapput. Utoqqaat pillugit inatsit malillugu malittarisassat nalitsinnut tulluartut ersarissullu kommunit sullissineranni tunngaviussapput. Pingaaruteqarpoq, utoqqaat pisariaqartitaat inatsimmi naammassineqassasut, aamma suliassaqarfiit utoqqaat inuunerannik kalluaasut ersersissinneqassasut. Utoqqaat pillugit inatsimmi takkuttussami siunertarineqarpoq utoqqaat ataqqinartumik utoqqalineq pillugu pisinnaatitaaffiat qulakkeerneqarnissaa.”

Ammasumik suleriaaseqarnissaq eqqarsaatigalugu erseqqissarneqarpoq, utoqqaat pillugit inatsimmik ataatsimoortumik suliaqarnerup inatsimmut taamatut ittumut suleriaatsit nalinginnaasut malissammagit. Taamaalilluni soqutigisaqaqatigiit avataaneersut, soorlu kommunit, peqqinnissaqarfik, utoqqaat peqatigiiffii aamma utoqqaat pillugit oqaaseqartartoq suliaqarnermi siusissukkut ilanngunneqassapput.

Naalakkersuisut kissaateqarput, soqutigisaqaqatigiit isumaat kissaataallu tusarneqassasut. Taamaalilluni inatsisiliornermik ineriartortitsinermi oqaloqatigiinnerup nangeqqinneranut nassuiaat manna aallaaviuvoq. Peqatigitillugu aamma pingaartuuvoq ersarissassallugu, inatsisiliornerup naggataatigut suliassaqarfik sammivilissammagu, kiisalu kommunit sullissineranni piviusorsiortumik tunngavilissallugit, taamaattumillu kissaatinik tamanik naammassinnissinnaanani.

Nalunaarusiaq uani atuarneqarsinnaavoq

Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut hspd@nanoq.gl imaluunniit oqarasuaatikkut + 299 34 56 11