Kalaallit Nunaanni, Danmarkimi Savalimmiunilu politiit- inissiisarfinnilu paarsisut naligiimmik akissarsiaqarnissaat atorfinitsitaanerminnilu atugaqartinneqarnissaat pillugit isumaqatigiinneq

Aningaasaqarnermut, Naligiissitaanermut, Aatsitassanut Inatsisillu Atuutsinneqarnerannut Naalakkersuisoq qallunaat inatsiseqarnermut ministeriannik Peter Hummelgaard-imik pingasunngornermi ataatsimeeqateqarpoq.

Ataatsimiinnermi qallunaat naalakkersuisuisa ataavartumik aaqqiissuteqarnissaq pillugu neriorsuutigisimasaat inatsiseqarnermut ministerip uppernarsarpaa, tassani politiit- inissiisarfinnilu paarsisut Danmarkimi Savalimmiunilu suleqatimik akissarsiaannut taakkununngalu atorfinitsitaanermi atugassarititaasunut akissarsiaat- atorfinitsitaanermilu taakkununnga atugassarititaasut naligiissinneqassallutik.

Naalakkersuisoq Naaja H. Nathanielsen tassunga atatillugu ima oqaaseqarpoq:

”Kalaallit Nunaanni politiit- inissiisarfinnilu paarsisut Savalimmiuni Danmarkimilu suleqatimik akissarsiaasa nalinginik akissarsiaqartinneqarnissaat pillugit qallunaat inatsiseqarnermut ministerianit neriorsuut Naalakkersuisut nuannaarutigeqalugu tiguaat. Akissarsiat immikkut aningaasaliissuteqartarnikkut qaffanneqartarsimanerat Naalakkersuisut nuannaarutigisimavaat, kisianni ilungersorlutik politiit- isertitsivinnilu paarsisut akissarsiaqartinneqarneranni ataavartumik aaqqiissuteqarnissaq ujartortarsimallugu. Inuiaqatigiinni sulisut eqimattakkuutaat taakku pingaaruteqarluinnartut sulisoriinnarnissaannut aamma sulisussarsiarineqarnissaannut tamanna pingaaruteqarpoq, aamma nunagisatta akornanni naligiinneq angussagutsigu, taanna pisariaqartinneqartumik suliniutaavoq.”

Akissarsiat- atorfinitsitaanermilu atugassarititaasut pillugit sammineqartup saniatigut Inatsisit atuutsinneqarnerannut suliassaqarfimmi sammisat pingaarutillit allat oqallisigineqarput, matumani pinerluttulerinermi inatsimmi pineqaatissiisarnermut killiliussap massakkut atuuttup ukiunit 10-iliiniit ukiunut 16-inut qaffanneqarnissaata Naalakkersuisunit kissaatigineqarnera ilanngullugu.

Naalakkersuisoq Naaja H. Nathanielsen ima oqaaseqaateqarpoq:

”Qallunaat inatsiseqarnermut ministeriannik oqaloqatiginninneq aallaaviatigut pitsaasumik kinguneqarluartumillu ingerlanneqarpoq. Ataatsimeeqatigiinnermi pineqaatissiisarnerit qaffanneqarnissaat saqqummiuteqqissimavarput. Qallunaat naalakkersuisooqatigiinnissamik tunngavigisaat uani innersuussutigivarput, tassanimi qallunaat naalakkersuisuisa Kalaallit Nunaanni akisussaaffigalugu suliassaqarfimminni inatsisit nutarterneqarnissaat salliutissagaat, erseqqilluinnartumik allassimavoq. Qallunaat naalakkersuisuisa kalaallit kissaataat akuersortumik pissagaat, uanga Naalakkersuisut sinnerlugit naatsorsuutigilluinnarpara”.

Tamatuma saniatigut eqqartuussivinnut ukiunut arlalinnut isumaqatigiissusiornissami aggersumi kissaatit oqallisigineqarput.

Isumaginninnermi Aqutsisoqarfimmi pitsaaliuinermik immikkoortortaqarfimmi Paarisami ataatsimiinneq naggaserneqarpoq, taakku akuersissuteqaqqaarnissaq pillugu inatsit nutaaq paasisitsiniaassutigisimavaat, aamma klinik Killiliisami pulaarneqarpoq, taakku kinguaassiuutitigut kannguttaatsuliortartunut katsorsaasarput.