Nunap immallu killeqarfii pillugit Canadap nunatta Danmarkillu akornanni isumaqatigiissut tamakkiisumik Inatsisartunit tunuliaqutserneqarpoq

Nunap immallu killeqarfii pillugit Canadap nunatta Danmarkillu akornanni isumaqatigiissut, ilaatigut aamma Tartupalummut tunngassuteqartoq, Inatsisartunit ataatsimoortunit tunuliaqutserneqartumik maajip 31-ani akuersissutigineqarpoq.

Isumaqatigiissummik akuersissutiginninnikkut nunatta nunarsuatsinni nunat killeqarfiisa naannersaat qeqertami 1,2 km-mik takissuseqartoq imaatigullu killeqarfiit tannersaat 3.962 km-mik takissuteqartup atuutsilersinnissaanut suliassani naammassivaa.

“Isumaqatiginninniarnerit sivisuut unamminartullu ingerlanneqareersut ullumikkut killiffipput oqaluttuarisaanikkut pisoq immikkuullarissorujussuuvoq. Isumaqatigiissut Inatsisartunit akuersissutigineqarsimalerpoq. Taamaattumillu suleqqinnissamut qilanaarpunga, pingaartumik naggueqatigiit Inuit Nunavummiittut Avanersuarmiittullu killilersugaanatik Tartupalummiissinnaalernissaat pingaaruteqarmat.” Taama Nunanut Allanut Inuussutissarsiornermut Niuernermullu Naalakkersuisoq Vivian Motzfeldt oqaaseqarpoq.

Maanna Canadami Danmarkimilu Inatsisartut isummernissaat utaqqineqarpoq. Nunarpullu isumaqatigiissummik akuersissutiginnittut siullersaraat.

Canadami Naalakkersuisut, nunatsinni Naalakkersuisut aammalu danskit Naalakkersuisuinik inuttalersugaasumik suleqatigiissitamik, killeqarfiit akimorlugit nuttarsinnaaneq pillugu pingaartumillu naggueqatigiinnut Inunnut Canadamiittunut aammalu Avanersuarmiittunut killilersugaanngitsumik Tartupalummiittarsinnaaneq eqqarsaatigalugu teknikkikkut misissuisussamik pilersitsisoqarpoq.


Attavissaq:
Naasunnguaq Beck Kristensen
Email: nabk@nanoq.gl
Mobil: +299 533684