AtuartigukNorge Issittumi Siunnersuisooqatigiinni siulittaasunngorpoq
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Issittumi Siunnersuisooqatigiit siulittaasoqarfiat isiginnaarutitigut ataatsimiinnermi sisamanngorneq maajip 11-nni ukioq 2023 Ruslandimiit Norgemut tunniunneqarpoq. Tunniussineq pisarneq malillugu naalakkersuisut ataatsimiinnerattut ingerlanneqanngilaq. Ataatsimiinnerli isiginnaarutitigut ingerlanneqartoq sivikitsoq, naalagaaffinnit arfineq-pingasunit peqataaffigineqarpoq, atorfilittatigoortumik (Senior Arctic Officials) nunallu inoqqaavisa kaffiffiinit peqataaffigineqartumik ingerlanneqarpoq. Kalaallit Nunaat Kunngeqarfiup Danmarkip aallartitaasa ilaattut atorfilittatigoortumik peqataatitaqarpoq.
Naalakkersuisoq Vivian Motzfeldt ima oqaaseqaateqarpoq:
”Issittumi siunnersuisooqatigiit siulittaasoqarfiata Ruslandimiit Norgemut tunniunneqarnera Naalakkersuisut sinnerlugit ilassilluarpara. Taamaaliornerup siunnersuisooqatigiit nunarsuarmi issittoq pillugu suleqatigiiffiit sallersaattut suli ingerlanera ersersippaa. Issittumi suleqatigiinnerup Norge siuttoralugu ingerlaqqinnissaa Naalakkersuisut isumalluarfigaat.”
Ataatsimiinnermi ataatsimoorullugu nalunaarut aalajangersarneqarpoq, ilanngussatullu isumaqatigiissut tuluttut allagaasoq kakkiullugu ilannguneqarpoq. Tassani takuneqarsinnaalluni siulittaasuuffik Norgemut tunniunneqartoq aammalu Issittumi Siunnersuisooqatigiinni sulinerup ingerlaannarnissaata qanoq pingaartiginera naqissuserneqarluni.
Attavissaq: Naasunnguaq Beck Kristensen mobil: +299 533684, email: nabk@nanoq.gl