Kangerlussuaq pillugu sinaakkutissatut isumaqatigiissut atsiorneqarpoq
Nassiussisuuvoq: Naalakkersuisut Siulittaasuata Naalakkersuisoqarfia![Mute og Erik](/-/media/naalakkersuisut/mute-b-egede/moeder/aftale.jpg?cx=0.48&cy=0.34&cw=975&ch=415&hash=F69E376EE0FEE74DAB5DE6E1696B108E)
Illersornissaqarfiup Kangerlussuarmi Mittarfimmik atuiinnarnissaa pillugu Naalakkersuisut Siulittaasuata Múte B. Egedep, Ineqarnermut Attaveqaasersuutinullu Naalakkersuisup Erik Jensenip kiisalu Illersornissamut Ministeriugallartup Troels Lund Poulsenip sinaakkutissatut isumaqatigiissut ullumi atsiorpaat. Sinaakkutissatut isumaqatigissummi sinaakkutitut isumaqatigiissut 2019-imi septembarimeersoq ilaatigut uppernarsarneqaqqippoq, tassalu Illersornissaqarfiup Kangerlussaq atuinnassagaa, mittarfik kalaallinit pigiinnarneqassasoq aammalu sakkutuujunngitsunit atorneqarsinnaassasoq.
Múte Bourup Egede: ”Inuiaqatigiinnik kalaallinut Illersornissaqarfiullu pisariaqartitaanik aallaavilimmik ataatsimoorluta isumaqatigiissuteqarsinnaaleratta nuannaarutigaara. Mittarfiup uatsinnit akisussaaffigineqartuarnissaa aammalu ilaasunik assartuinermi Illersornissaqarfiullu timmisartuinit siunissami atorneqarsinnaanissaa qulakkeerparput. Mittarfiup iluarsaanneqarnera, aserfatsaalineqarnera aningaasalersorneqarneralu Illersornissaqarfiup akisussaaffigaa, Illersornissaqarfiup siunissami pisariaqartitai naapertolugit.”
Illersornissaqarfimmut sinaakkutitut isumaqatigiissut Erik Jensenittaaq nuannaarutigaa.
”Illersornissaqarfiup Kangerlussuarmi pisariaqartitassaasa piareersarneqarnissaat tullinnguuppoq tassunga ilaallutik mittarfiup pitsaassusaa iluarsarnissaalu, init pisariaqartinneqartussat kiisalu Illersornissamut kiffartuussisarnissat,” taamak Erik Jensen oqarpoq.
Troels Lund Poulsen: ”Illersornissaqarfiup naalagaaffeqatigiiffimmi tamarmi inuiaqatigiinni suliassat pingaarutillit suliarisarpai. Taamaattumik Kangerlussuup mittarfiata Illersornissaqarfimmit atorneqaannarnissaa Namminersorlutik Oqartussat peqatigalugit ilusilersorsinnaasimagatsigu nuannaarutigaara. Nunap ilaani pingaartitagut pisussaaffigullu taamatut erseqqissarneqarput - aamma Kalaallit Nunaanni nutaanik mittarfittaartoreernerit kingorna.”
Naalakkersuisuni ilaasortat taakku marluk Kangerlussuarmi innuttaasunut ataasinngornermi unnukkut ataatsimiititsissapput.
”Innuttaasunik naapitsinissarput qilanaaraarput, Kangerlussuup innuttaasullumi siunissaat inuit pineqartut tikillugit eqqartorusukkatsigu," taamak Naalakkersuisuni ilaasortat marluusut oqarput.
Illersornissaqarfiup Kangerlussuarmi mittarfimmik atuiinnarnissaa pillugu sinaakkutissatut isumaqatigiissut, aprilip 24. April-neersoq 2023.
Annertunerusumik paasisaqarusuttunut attavigineqarsinnaavoq:
Múte Bourup Egedep allattaa, Niels Dorph, mail: ndor@nanoq.gl
Erik Jensenip allattaa, Thora M. Hansen, mail: tmha@nanoq.gl
Illersornissaqarfik, mail: presse@fmn.dk