Qeqqata Kommuniata aamma Naalakkersuisup Erik Jensenip Kangerlussuup siunissaa pillugu nalunaarusiap tamanut saqqummiunneqarnera pillugu ataatsimoorlutik tusagassiuutitigut nalunaarutaat

Ukiut pingasut suliarineqareerluni Kangerlussuup siunissaa pillugu nalunaarusiaq tiguneqarpoq aammalu Naalakkersuisunit tusaatissatut tiguneqarluni, taamaattumillu tamanut saqqummiunneqarsinnaalerluni.

Naalakkersuisut ulloq 23. marts 2023 ataatsimiinnerminni nalunaarusiaq tusaatissatut tiguaat kiisalu Aningaasaqarnermut Naligiissitaanermullu Naalakkersuisoqarfimmit allakkiaq ilanngussaq tamanut saqqummiunneqassasut aalajangerlutik.

Suliaq suleqatigiissitaliap Naalakkersuisut mittarfiit nutaamik ilusiligaanerisa sunniutigisaanik 2019-imi pilersitaasa inerneraa. Suleqatigiissitaliami ilaasortaapput atorfilittat Qeqqata Kommunianeersut, Arctic Circle Business-imeersut, Ineqarnermut Attaveqaasersuutinullu Naalakkersuisoqarfimmeersut, Nunanut Allanut, Inuussutissarsiornermut Niuernermullu Naalakkersuisoqarfimmeersut kiisalu Aningaasaqarnermut Naligiissitaanermullu Naalakkersuisoqarfimmeersut.

Nalunaarusiami suliaqarnerup ingerlaqqinnissaanut inassuteqaatit arlallit saqqummiunneqarput, ilanngullugu nunaqarfimmi attaveqaasersuutit siunissaat, suliassat nalinginnaanngorsarneqarnerisa ingerlaannarnissaa aammalu inuussutissarsiornermut periarfissanngortussat.

Ineqarnermut Attaveqaasersuutinullu Naalakkersuisoq, Erik Jensen, tassunga atatillugu oqarpoq:

”Kangerlussuup siunissaa pillugu nalunaarusiaq maannakkut tamanut saqqummiussinnaaleratsigu nuannaarutigaara. Nalunaarusiami inassuteqaatit soqutiginaatillit arlaqarput, ilanngullugit mittarfippiaq pillugu apeqqut annertooq aammalu takornariartitsinertut ittumik ineriartortitsinissaq. Soorunami inassuteqaatit maannakkut suliaralugit ingerlaqqittussanngorpugut.”

Qeqqata Kommuniani Borgmesteri, Malik Berthelsen, oqarpoq:

”Kangerlussuarmi Mittarfik pingaarutilittut mittarfiuinnassasoq aammalu nunap immikkoortuani ineriartortitsinermut ornigassaassasoq, immikkut maluginiarpara. Nalunaarusiap sivisuumik ingerlanneqarsimanera pissutigalugu maannakkut nalunaarusiami inassuteqaatit tunngavigalugit iliuuseqarnissaq nukinginnarpoq.”

Uani takussinnaavatit Nalunaarusiaq aammalu Aningaasaqarnermut Naligiissitaanermullu Naalakkersuisoqarfimmiit allakkiaq

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl