Peqqinnissaq pillugu Ataatsimiititaliarsuup isumaliutissiissutini tamanut saqqummiinera

Peqqinnissaq pillugu Ataatsimiititaliarsuup isumaliutissiissutini ataasinngornermi 22. maj 2023-mi tamanut saqqummiutissavaa tassungalu tunngatillugu Peqqinnissaq pillugu Ataatsimiititaliarsuaq Naalakkersuisut tusagassiortunik katersortitsisarfianni nal. 15.00-imiit nal. 16.30-p tungaanut tusagassiortunik katersortitsissaaq.

Ataatsimiinneq toqqaannartumik aallakaatinneqassaaq aamma toqqaannartumik oqalutseqartoqarlunilu ussersorluni oqalutseqartoqarumaarpoq.

Ulrik Blidorf, Peqqinnissaq pillugu Ataatsimiititaliarsuarmi siulittaasoq ima oqarpoq:

”Suliarujussuaq Peqqinnissaq pillugu Ataatsimiititaliarsuup qanittukkut tamanut saqqummiussinnaalissavaa. Ukiuni kingullerni nunami maani pitsanngorsaanissanut tulluarnerpaanik siunnersuuteqarsinnaajumalluta peqqinnissaqarfimmi sanngiiffiit nukittuffiillu aamma innuttaasut peqqinnissaqarfik pillugu kissaataat misissugarisimavavut. Peqqinnissaq pillugu Ataatsimiititaliarsuup isumaliutissiissutaa imaaliallaannarlugu peqqinnissaqarfimmi unamminartunik tamanik iluarsiissutaasinnaanngilaq. Neriuppungali Ataatsimiititaliarsuup siunnersuutai innuttaasunik naalakkersuinermillu sulialinni oqallinnermut pissutaajumaartoq neriuutigaara. Siunissami nukittunerusumik peqinnissaqarfeqassagutta arlalinnik pingaarutilinnillu aalajangiisariaqarpugut.”

2020-mi upernaakkut Naalakkersuisut Peqqinnissaq pillugu ataatsimiititaliarsuaq pilersippaat, taakkualu suliassaraat peqqinnissaqarfimmi ingerlatsineq naleqqussarnissaanut pitsanngorsarnissaanullu siunnersuuteqarnissat, tamatumani ilaalluni peqqinnissaqarfiup ataatsimut aaqqissuussaanera, sulisussarsiortarnera sulisullu sulisorineqaannarnissaanut kiisalu Danmarkimiit nunaniillu allanit suleqateqarnerit. Siunnersuutigineqartut peqqinnissaqarfimmi aaqqissuusseqqinnissamut Inatsisartunut politikikkut tunngaviliissapput.

Peqqinnissaq pillugu Ataatsimiititaliarsuup isumaliutissiissutini 2022-mi upernaakkut tunniuttussaasimagaluarpaa kisiannili katersorsimasuni corona pillugu killilersuinerit peqqinnissaqarfimmilu upalungaarsimanerunerup suliaq ukiumik ataatsimik kinguartippaa.

Paasisaqarnerorusukkuit Peqqinnissaq pillugu Ataatsimiititaliarsuup allatseqarfia e-mailikkut ugguuna imaluunniit oqarasuaatikkut ugguuna attaveqarfigineqarsinnaavoq. + 299 345527

Ulrik Blidorf
Peqqinnissaq pillugu isumalioqatigiissitami siulittaasoq