AtuartigukNaammaleqaaq: Kinguaassiutitigut naapertuilluanngitsuliornerit nipangiusimallugit isiginngitsuusaaginnassanngilagut
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Meeqqanik inuusuttunillu kinguaassiutitigut naapertuilluanngitsuliortarnerit inuiaqatigiinni annertuumik ajornartorsiutaavoq tamannalu amerlasuut nipituumik eqqartunngippallaarpaat. Inuiaqatigiittut pisussaaffeqarnerput takutissavarput tamannalu unitsillugu, Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen oqarpoq.
Nunatsinni meeqqat inuusuttullu kinguaassiutitigut naapertuilluanngitsuliorfigineqarnikut nalunaarutigineqartut suli amerlapput. Ilaalli isiginngitsuusaarneqartarlutillu nipangiusimaannarneqartarput.
Kalaallit Nunaanni Politiit ukiumoortumik 2022-mi kisitsisaataanni atuarneqarsinnaavoq meeqqanik kinguaassiutitigut naapertuilluanngitsuliortarnerit nalunaarutigineqartut qaffariarsimasut. Pinerluttuliornerni nalunaarsorneqarsimasuni kisitsisit taamaallaat takutinneqarput, paasineqanngitsoortummi ilaanngimmata.
Tamanna ernumanartumik nalinginnaasunngoriartortoq ataatsimoorussamik iliuuseqarfigineqartariaqartoq, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen isumaqarpoq:
”Meeqqanik inuusuttunillu kinguaassiutitigut naapertuilluanngitsuliornerit matoqqasumi pisarput taamatullu pinerluttuliornerit amerlasuut ajoraluartumik naammattoorneqarneq ajorput nalunaarutigineqarnerlu ajorlutik. Inuiaqatigiittut pisussaaffeqarnerput takutissavarput tamannalu unitsinniarlugu qaqittariaqarparput,” Mimi Karlsen oqarpoq, nangillunilu:
”Kinguaassiutitigut atornerluisarnernut pitsaaliuinissamut oqartussaasut akisussaaffeqarput. Tamannali naammanngilaq. Inersimasut tamarmik, ilaqutaagaluarpata, perorsaasuugaluarpata, ilisarisimasaagaluarpata allaagaluarpataluunniit, kinguaassiutitigut atornerluisarnerit pillugit nalunaarutiginnittarnissamik immikkut akisussaaffeqarput. Pingaaruteqarluinnarpoq meerartagut isumassorlugit oqartussaasut ilanngutitinnerisigut qisuariartarnissarput,” Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen erseqqissaavoq.
Sukumiisumik paasisaqarusukkuit naalakkersuisup allattaa Naja Lynge Petersen e-mailikkut nalp@nanoq.gl imaluunniit oqarasuaatikkut: +299 34 66 41 attavigiuk.