Gassit silaannarmik kissakkiartortitsisartut flourimik akullit annikillisikkiartuaartinnissaat Kalaallillu Nunaata akuutissanik silaannarmut ulorianartunik takussaaffiulinnginnissaa pillugit nalunaarusiaq nutaaq.

Gassit silaannarmik kissakkiartortitsisartut flourimik akullit, pingaartumik suliffeqarfissuarni nillasaatitut atorneqartartut, pillugit Naalakkersuisut nutaamik nalunaarusioqqammerput. Nalunaarusiap akuutissat pineqartut annikillisikkiartuaartinneqarnissaat qulakkiissavaa.

Nalunaarusiap Montrealimi imaqarniliamik allannguineq kingulleq, tassa Kigalimi isumaqatigiissut, ersarissassavaa. Montrealimi imaqarniliap pingaarnertut siunertaa tassaasimagaluarpoq akuutissasnik ozon-imik aseruisartunik atuinerup annikilliartortinneratigut illersuinissaq.

Tamatuma kingorna akuutissat ozon-imik aseruisartut ajoqutaanngitsunik, akerliatigulli gassinik silaannarmik kissakkiartortitsisartunik, nunarsuup silaannaata kissakkiartorneranik allanngorarnermik pilersitsisunik, taarserneqarsimapput.

Nunarsuarmi akuutissanik atuiunnaariartornissaq naatsorsorneqarsimavoq silaannaap kissatsikkiartorneranik 0,5 gradi angullugu annikillisaasinnaasutut.

• Naalakkersuisunut pingaarruteqarpoq akuutissanik silaannarmut ajoqutaasunik nungusaaniarneq ilutigalugu Kalaallit Nunaata tunisassiorfinngunnginnissaa. Tamatumanittaaq Kalaallit Nunaata nunarsuarmi silaannaap allanngoriartorneranut akisussaaffimmik tiguseqataanissaa oqariartuutaavoq, taamatut oqaaseqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund.

Kalaallit Nunaat nunat allat assigalugit 2035-p naaneranit gassinik silaannarmik kissakkiartortitsisartunik flourimik akulinnik inerteqquteqalissaaq. Piffissap inerteqquteqalerfiusup nalaani allanik taartissaqanngivippata pisuni immikkut ittuni gassinik taakkuninnga atuiniinnarnissamut akuersissuteqartoqartarumaarpoq.

Tunuliaqut
Nunat 193-it FN-imut ilaasortaasut Montrealimi imaqarniliamut akuersaarput. Kigalimi isumaqatigiissut massakkuugallartoq nunanit FN-imi ilaasortanit 148-nit atsiorneqarpoq.

Inatsisit
Kigalimi isumaqatigiissut Montrealimi imaqarniliamut kakkiunneqarmat tamanna Gassinik silaannarmik kissakkiartortitsisartunik flourimik akulinnik atuinermut nalunaarusiap pilersinnerata saniatigut nalunaarusiaq 2001-imeersoq akuutissanut assigiinngitsunut ozon-imut aseruisunik imallip nutarter eqarnissaa pisariaqalersimavoq.

• Akuutissat ozonimik aseruisartut ilaat pillugit Namminersorlutik Oqartussat nalunaarutaat nr. 32 28. oktober 2022-meersoq.
  
• Gassit silaannarmik kissakkiartortitsisartut flour-imik akullit ilaat pillugit Namminersorlutik Oqartussat nalunaarutaat nr. 13 24. marts 2023-meersoq.

Annertunerusunik paasisaqarusunnermi attavissaq:
Naalakkersuisoqarfimmi pisortaaneq Natuk Lund Olsen, oqarasuaat 34 64 71 imaluunniit mailimut uunga: natl@nanoq.gl