Nunarsuaq tamakkerlugu peqqissutsimut kattuffik Nuummut Atammimmut aamma Ilulissanut tikeraassaaq.

Nunarsuaq tamakkerlugu peqqissutsimut kattuffik (WHO) ulluni makkunani Kalaallit Nunaannut tikeraarpoq  Tikeraanermi siunertarineqarpoq WHO-p peqqinnissaqarfimmut, nunatsinni peqqissutsimut aamma kalaallit nunaata immikkuullarissuunera pillugu annertunerusumik paasisaqarnissaq.  Hans Henri P. Kluge-p, WHO Europami nunap immikkoortuinut pisortap angalaqatigaa Danmarkimi Peqqissutsimut Aqutsisoqarfimmi pisortaq aamma WHO-mi nunarsuaq tamakkerlugu siulersuisunut ilaasortaq Søren Brostrøm.

”Who-p Nunatsinni peqqissuseq pillugu soqutiginninneranut nuannaarutigaarput tikilluaqqullugillu. Innuttaasut peqqissusaata ineriartornera pillugu eqqartuinissamut peqatigisaanillu unammilligassatut nalaatatsinnik WHO-mut ilisimatitsinissamut tikeraarneq periarfissatsialaavoq. Naatsorsuutigaara tikeraarneq nunatsinni peqqissutsimut tunngasunik ataatsimut paaseqatigiilersitsissasoq aammalu kikkut tamarmik assigiimmik peqqissutsikkut sullinneqarsinnaanerat qulakkeerniarlugu qanoq sulissanersugut, Jess Svane Isumaginninnermut, Sulisoqarnermut, Nunamullu Namminermut Naalakkersuisoq oqarpoq.

Nunarput siullermeertumik pisortatigoortumik qaffasissumik inissisisimasumit WHO-mit tikeraartoqarpoq WHO-milu Europami nunap immikkoortuinut pisortaq, Hans Henri P. Kluge, tullinnguuttunik oqaaseqarpoq:

“Tikeraarneq periarfissiivoq peqqinnissamut tunngatillugu peqqinnissakkut sullissisut aalajangiisartullu namminneerlutik misigisaasa tusarnaarnissaannut ilinniarnissaannullu. Europami nunap immikkoortuinut assigiinngitsunut avitseqatigiissutigineqartariaqartunik, peqqinnissaqarfiup iluani suleriaatsimut pitsaasumut nutaaliornermullu tunngatillugu Kalaallit Nunaat isumassiorfiusunik amerlasuunik neqerooruteqarpoq. Ungasissorsuarmiittunik qarasaasiakkut nakorsiartitsisarnermiit peqqissutsikkut sullissinermut, peqqissaasut suliassaasa annertusinerannut, inuit pinngortitallu akornanni sunniivigeqatigiinnermik paasinnilluarnermut,” taama ilassuteqarpoq.

Politikkikkut naapitsinerup saniatigut WHO-mit aallartitat tikeraagassaraat kommunini immikkoortortat, Ilisimatusarfik Peqqinnissaqarfillu, taakkuami ulluinnarni peqqissuseq inuulluarniarnerlu pillugit suliaqartuummata.

Sukumiinerusumik paasisaqarusukkuit naalakkersuisumut allatsi Frederik Kristiansen attavigiuk e-mailikkut: frek@nanoq.gl imaluunniit oqarasuaatikkut: 34 56 85