AtuartigukNaatsiiat pillugit isumasioqatigiinneq: Ussassaarineq tuniniaanerlu nukittorsarneqartariaqarput
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Nunalerinermut, Imminut pilersornermut, Nukissiutinut Avatangiisinullu Naalakkersuisoq Kalistat Lund Narsami 29. marts naatsiiat pillugit isumasioqatigiisitsivoq naatitsisartunit, Viking II, Neqi A/S, RAL, Brugseni, Kommune Kujalleq, SPS, Nunalerineq pillugu siunnersorteqarfik, naatitsisartoq Namminersorullutillu Oqartussani Nunalerineq pillugu kiisalu Imminut pilersornermut immikkoortortaqarfimmiit peqataaffigineqartumik.
”Naalakkersuisut pingaartittorujussuuvaat kalaallit naatsiiat naatitaat ukiut tamarluinnaasa pisisartunit atorneqartassasut. Nuannaarutigaara isumasioqatigiinnermi naatsiiassat nunamut ilineqarnerminiit pisisartunut anngunneqarnissaata tungaanut suliallit peqataammata. Suliassat annerpaat qulaajarpagut, tassaasullu naatsiaat ussassaarutiginissaat kiisalu qajannartuunerisa paasisititsiniutiginissaa. Naalakkersuisut piumassuseqarput suliassat naammassinissaannut. Allannguinissamut peqataarusunneq piumassuserlu annertoorujussuupput, isumasioqatigiinnerlu iluatsilluarpoq,” Kalistat Lund oqarpoq.
Naatsiianik tunisassiornermik attuumassuteqartut tamarmik peqataatinneqarput – naatsiiassaniit pisisartunut anngunnissaannut.
Naatsiiat nunatsinneersut pitsaalluinnarput, paarilluarneqartariaqarpulli kiammut qaamanermullu sunnertiammat. Tassunga atatillugu immakkut assartuineq, peqqumaasiviit, immikkoortitseriviit poortuutit, unammillersinnaanera, pisiniarfinni inissinneqartarfii akiilu eqqartorneqarput. Taakkuupput aalajangiilluinnartut pitsaasumik atuisartunut anngunnissaannut. Naatsiiassat nutaat aamma eqqartarneqarput kiisalu naatsiiat toqunartunik serpartarneqarneq ajorput kiisalu oqoqanngitsut nunatsinni naatsiiat ilisarnaaqutigissavaat.
Isumasioqatigiinnermi peqataasut isumaqarput nunatsinni naatsiiat naatitsinerup aallartinnginnerani ussassaarutigalugit aallartereertariaqartut, taamaalilluni nunatsinni naatsiiat naatinneqartut salliutillugit tuniniarneqarnissaat pilersaarusiorneqarsinnaassammat. Taamatuttaaq imminut pilersorneq siuarsarneqassappat nukinnik aningaasanillu tunniussisoqartariaqartoq eqqartorneqarluni. Suliassat ersarissut ilagivaat imminut pilersorneq pillugu siunnersuisooqatigiiviliortoqartariaqartoq Naalakkersuisunut siunnersuisinnaasunik.
Sukumiinerusumik paasisaqarusukkuit Naalakkersuisumut allatsi Manasse Berthelsen attavigiuk, toqqaannartumik normu +299 34 56 03 imaluunniit maili: mabr@nanoq.gl