Schweizimiup qaqqat sisoortarnerannut immikkut ilisimasallit immikkut ilisimasaqarnertik takutissavaat.
Nassiussisuuvoq: Aatsitassanut Inatsisillu Atuutsinneqarnerannut Naalakkersuisoqarfik![Aqqaluaq B. Egede](/-/media/naalakkersuisut/aqqaluaq-b-egede/aqqaluaq-16_9.jpg?cx=0.5&cy=0.5&cw=975&ch=415&hash=4A05C3BC6FBCB80B43C6D91D68BC17E4)
Kalaallit Nunaanni qaqqat sisoortarnerannut aarlerinaataasut pillugit qanoq annertunerusumik ilisimasaqalersinnaanersugut pillugu paasissutissanik pissarsiniarluni Aatsitassanut Inatsisillu Atuutsinneqarnerannut Naalakkersuisoq Schweiz-imut angalassaaq.
Qaqqat sisoornerannut atatillugu aarlerinaataasunut atatillugu qanoq innuttaasut ikiorsinnaavagut, taamaakkaluartorlu toqqissisimanerulersissinnaallugit?
Apeqqutit qulaajaaviginiarlugit Aatsitassanut Inatsisillu Atuutsinneqarnerannut Naalakkersuisoq Aqqaluaq B. Egede Schweiz-imut angalassaaq, qaqqat sisoortarnerannut immikkut ilisimasallit oqaloqatigiartorlugit.
Schweiz nunaavoq qaqqartoorsuaq. Nuna qaqqaq sisoorsinnaanerannik alapernaarsuinermi ilisimatusarnerup misilittagaqarnerullu iluanni siuarsimanerpaat ilagaat. Naalakkersuisoq pinngortitami ajunaarnersuaqarnerinut taakkununnga alapernaarsuinermut atortut iluanni ilisimasaqarnerulerniarluni, Schweiz-imut paasisassarsiorluni angalaniarpoq.
”Ujarassiuut ilisimatuullu qaqqat sisoorsinnaanerannik alapernaarsuinermut atortunik assigiinngitsunik ineriartortitsisimasut naapissavakka. Palle Jerimiassen aammalu Avannaata Kommuniani kommunalbestyrelsimut ilaasortat ilai peqatigalugit angalassaanga.”
“Schweizimiut ujarassiuut misilittagaat ilisimasaqarfigilerusuppagut, taamaalilluta qaqqanut qajannartuusinnaasunut nunatsinni maani upalungaarsimanermi, aammalu innuttaasut taakkua eqqaanni najugaqartut toqqissisimanerulersissinnaanissaannut, taakkua atorsinnaassallutigu. Nunani qaqqartuuni immikkut ilisimasallit suleqatigalugit Kalaallit Nunaanni qaqqani qajannartortalinni alapernaarsueriaatsinik sapinngisamik pitsaanerpaamik ikkussuissaagut. Siunertaavoq Uummannap sulluani innuttaasut sapinngisamik pitsaanerpaamik illersornissaat ", oqarpoq Naalakkersuisoq.
Aatsitassanut Inatsisillu Atuutsinneqarnerannut Naalakkersuisup ukioq manna Uummannap sulluani inoqarfiit tikeraarnissai naatsorsuutigaa.
”Innuttaasut inuunerannik pitsaanerpaamik illersuinissap qulakkeernissaa pingaarnerpaajuvoq. Suliassap taassuma annertuup aningaasartuuteqarfiusussallu iluani ilisimasanut tunngatillugu suli anigorniagassaqarpugut. Siunissami qanittumi Schweizimi oqartussanut, alapernaarsueriaatsinik sivisuumik misilittagaqartunut, suleqatigiinnissamut isumaqatigiissuteqarnissarput naatsorsuutigaarput. Uummannap sulluani innuttaasut inuunerannik illersuinissamut aaqqiissutissanik pitsaasunik ujartuivugut. ”
Paasissutissanik annertunerusunik piniarnermi Naalakkersuisup allattaani Lars Salik Kielsen attaveqarfigineqassaaq: LSAK@nanoq.gl