Mimi Karlsen: Meeqqat Tunuminngaanneersut inissinneqarsimasut kulturikkut atassuteqarnertik annaassanngilaat

Meeqqat Tunuminngaanneersut sapinngisamik illoqarfigisami qanittuanut ulloq unnuarlu paaqqinnittarfinnut inissinneqartassapput. Tamanna Meeqqanut, Inuusuttunut, Ilaqutariinnut Peqqissutsimullu Naalakkersuisup Kommuneqarfik Sermersuumilu borgmesterip isumaqatigiissutigivaat. Meeqqat tamarmik oqaatsiminnik kulturiminnillu atatitsiinnarnissaminnut pisinnaatitaaffeqarput, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen taama erseqqissaavoq.

Meeqqaat Tunuminngaanneersut sinerissami ulloq unnuarlu paaqqinnittarfinni Namminersorluni Oqartussanit pigineqartunut inissinneqarsimasut katillugit 36-upput. Taakkunani 23-t Tasiilap avataanut ilaquttami kulturikkullu atassuteqarnerannut ungasittumut inissinneqarsimapput.

- Ajoraluartumik meeqqat Tunup avataanut inissinneqaraangamik oqaatsiminnik kulturikkullu atassuteqarnerminnik annaasaqarnissaannut navianartorsiortunik naammattuuisarpugut. Pisinnaatitaaffigisaattut kulturikkut kinaassusaat pillugu atatiinnarnissaat eqqarsaatigissavarput peqataaffigalugulu, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen oqaaseqarpoq.

Tasiilami ulloq unnuarlu paaqqinnittarfimmik allisaanissamut periarfissat takuniarlugit Meeqqanut, Inuusuttunut, Ilaqutariinnut Peqqissutsimullu Naalakkersuisup Kommuneqarfik Sermersuumi borgmesteri, Avaaraq Olsen, suleqatigissavaa, taamaasillutik meeqqat inissinneqartussat annerusumik ilaquttaminnut qanillutik Tunumiiginnarnerussammata.

Naalakkersuisut iliuusissatut pilersaarutaani Pitsaaliuineq pitsaanerusoq, inissiinerit ikinnerusut: 2023-2030-mi ilaqutariinni pitsaaliuinermik sulineq pillugu iliuusissatut pilersaarutit, ilaatigut ilaqutariinni atugarliorneq sumiginnaanerlu pinaveersaartinnissaannut anguniagaqarpoq, aamma meeqqat inuusuttullu angerlarsimaffiup avataanut inissinneqartarnerannut ikinnerulernissaannut qulakkeerinnilluni.

Meeraq Tunuminngaanneersoq ulloq unnuarlu paaqqinnittarfimmut inissinneqassappat, sapinngisamik qaninnerpaamut inissinneqartassaaq, meeqqap ilaquttani ilagisinnaanissaanut kulturiminullu atassuteqaannarnissaanut periarfissaqarsinnaasussaammat.

Meeqqap pisariaqartitaanik atorfissaqartitaanillu qitiutitsinissaq pingaaruteqarpoq. Meeqqap suminngaanneernera apeqqutaatinnagu meeqqap inuunerani aalajangiisoqartillugu meeqqamut suna pitsaanerpaanersoq qaqugukkulluunniit pingaartinneqartuassaaq.

- Meeqqap peqqinnartumik peroriartornissaanut killiliussat pitsaasut piginnaasallu eqqortut aalajangiisuupput. Kommuneqarfik Sermersuumik suleqateqarnerup ingerlaannarnissaa qilanaaraara, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen oqarpoq.

Sukumiinerusumik paasisaqarnerorusukkaanni naalakkersuisup allattaanut Naja Lynge-Petersenip emailianut: nalp@nanoq.gl imaluunniit oqarasuaataanut: +299 34 66 41-mut attaveqartoqarsinnaavoq.