AtuartigukQimmerput qimuttoq inuusaatitsinnut pingaaruteqartorujussuaq
Nassiussisuuvoq: Aalisarnermut Piniarnermullu Naalakkersuisoqarfik
Piniartoqarlunilu aamma aalisartoqarpoq ulloq manna tikillugu qimminik qimuttoqarlutik inuuniuteqartunik. Qimmeqaratik inuusaasertik attassinnaanngilaat, nunatsinni qimmeq qimuttoq inuutissarsiornermut suli pingaaruteqarluinnarluni. Piniartut aalisartullu siulimittulli maannamut suli qimmilereriaaseqarlutik, itsarsuarli qimmileriaatsit suli ukkatarineqarlutik. Qimmeqarfiit ilaanni uuttorniartoqartalereerpoq, uuttorniartoqalissallunilu. Uuttorniarnermi qimmit pingaarutilerujussuupput, qimussimimmi puisi tikillugu pisarineqarsinnaanngilaq. Soorlumi aamma nannunniarnermi
taamaattoq.
Qimmit piniutitut aalisarnermilu atorneqartut ilitsoqqussaraakka, nammineerlutalumi aamma qimmeqarpugut, taamaattumik piniartut aalisartullu qimmiminnik maannamut inuuniuteqartut ataqqisorujussuuakka kinguaanullu tulliuttunut maligassiuisutut isigalugit.
Neriuutigaara qimmit ukiorpassuarni siunissami suli taama atorneqarlutik pineqartarumaartut.
Kalaallit Nunaanni Qimussertartut Kattuffiata Avannaata Qimussersuanik ukiut tamaasa sukkaniutsitsisarneranut nuannarinnittuullungalu malinnaajuarpunga. Avannaani qimmeq pillugu peqatigiiffippassuarni namminneerlutik qimmeqartuarnissaq pillugu qasusuillutik suliniuteqartunut, qimmeq qimuttoq pillugu kultureqartuarnissatsinnut qulakkeerinnikkusuttunut angisuumik qutsatissaqarpunga, aamma Kalaallit Nunaanni Qimussertartut Kattuffiat qujaffigerusuppara.
Qimuttunik qimmeqarnitsinnut kulturerput sakkortuumik ukiuni kingullerni tatineqaleraluttuinnarpoq, qimmit ikiliartorlutik. Taamaattumik qimmeq qimuttup attattuaannarnissaa pingaarutilipilussuuvoq, Aalisarnermut Piniarnermullu Naalakkersuisoq Karl Tobiassen oqarpoq.
Aalisarnermut Piniarnermullu Naalakkersuisoq erseqqissaavoq nunatsinni qimmit qimuttut inatsisartut inatsisitigut illersugaammata, nappaatinut navianartunik nappaateqalernissaat pinaveersaarniarlugu kapuussutissanut aningaasaliisoqartartoq.
Qimmit inatsisikkut illersugaapput tamatumani siunertarineqarluni nunatsinni qimmit peqqissuunissaasa qularnaarneqarnissaat, kalaallit qimmiat qimuttoq allanik akuneqatsaaliussallugu kiisalu inuit, uumasut avatangiisillu qimmit ajoqusiisinnaanerinut illersussallutik.
Kalaallit Nunaanni Uumasunut nakorsaqarfiup Inussutissalernermullu Oqartussaaffiup nuna tamakkerlugu qimminik akiuussusersuisarnermut pilersaarut isumagisarpaa, tamatumunnga ukiumut 1,9 million koruunit inatsisartut aningaasanut inatsisaatigut akilerneqartarlutik.
Paasissutissaq
”Ilisimatusartut misissuinerisa ilatigut takutippaat qimmeq qimuttoq inuit,Saqqaq kulturimeersut, siulliit nunatsinnut ukiut 4.500-t matuma siorna ikaarmata ikaaqataasoq. Qimmit taakku inuit Thulemeersutut taaneqartut nunatsinnut ukiut 1.000-it matuma siorna ikaartut qimmiinit mikinerupput tuannerullutillu. Qimmit Thulemeersutut taaneqartartunit qimmerineqartut Canadamit ikaarutigineqarput nunattalu sineriaanut siaruarlutik. Inuit Saqqap kulturianeersut Sibiriamit kingoqqisuupput, naatsorsuutigineqarporlu Saqqaq kulturimeersut siulii qimmeqalersimassasut, maannakkut qimmerineqartunut assingusunik, taama Qimmeq projektip allatseqarfia internettimi atuagassiamini ilaatigut allappoq.
Aalisarnermut Piniarnermullu Naalakkersuisoq Karl Tobiassen Avannaata Qimussersua Sisimiuni apriilip aallaqqaataani 2023-mi ingerlanneqalerpat isiginnaartut akornanniissaaq.
Attavigineqarsinnaavoq
Aalisarnermut Piniarnermullu Naalakkersuisoqarfik. APN@nanoq.gl