AtuartigukNalunaarusiaq: Alliamut saaffiginnittartut amerliartorput
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Ukioq 2022 siornatigornit innersuussinernik amerlanerusunik nalaarsiffiusimavoq, qanigisariinni nakuusertarneq unitsinniarlugu arlaqarnerusut ikiorneqarnissamik ujartuisalerput.
Alliaq ukiumut 2022-mut ukiumoortumik nalunaarusiamik nutaamik saqqummiussivoq, tassani takuneqarsinnaavoq innersuussinerit amerlassusaat ukiumut kingullermut naleqqiullugu 79-imiit 119-imut qaffariarsimasut.
Taamatut ineriartortoqarneranut pissutaasoq tassaavoq arlaqarnerusut ikiorneqarnissamik ujartuinissaminnut sapiissuseqarnerulersimanerat, taamaattoqarnerata nakuusertarnerup paquminartuutikkunnaarnissaanut nipangiusimaannarfigiunnaarnissaanullu iluaqutigissavaa.
- Nakuusertartuugaanni tamassuma tungaatigut nipangiusimajunnaarnissamut sapiissuseqartariaqarpoq. Taamaattumik nakuusertarneq unitsinniarlugu katsorsarneqarnissamik neqeroorummik arlaqarnerusut atuilernerat pitsaasuuvoq, taama oqarpoq Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen.
Innuttaasunut qanigisaminni nakuusertarnermik ajornartorsiutilinnut paasissutissanik atortussianik nutaanik Alliaq ineriartortitsisimavoq. Peqatigisaanik kommuniniit sulianik ilisimasallit, politiit, Allorfik, Pinerluttunik Isumaginnittut kiisalu sulianik ilisimasallit allat nakuusertarnermut suliassaqarfimmi sulisut attuumassutillit peqataaffigisaannik isumasioqatigiissitsisoqarnikuuvoq.
2022-miit ineriartornerup ingerlaannarnissaa nutaanillu suliniuteqartoqarnissaa Alliap neriuutigaa, taamaaliornikkummi suli amerlanerit ikiorneqarsinnaapput.
Nalunaarusiaq uani atuaruk.
Alliaq pillugu tusagaqarnerorusukkuit ikiorneqarnissamulluunniit innersuunneqarusukkuit Alliaq oqarasuaatikkut uunga 34 50 40-mut sianerlutit attavigisinnaavat. Oqarasuaat sapaatip akunnera tamaat nal. 9.00-imiit 21.00-imut sianerfigineqarsinnaavoq.
Sukumiinerusumik paasissutissat pillugit naalakkersuisup allattaa Naja Lynge-Petersen, e-mailikkut: nalp@nanoq.gl imaluunniit oqarasuaatikkut: +299 34 66 41 attavigiuk.