AtuartigukOqaatsitta atugaaneranni ilinniartitsissutaanerannilu anguniakkat najoqqutallu
Nassiussisuuvoq: Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter P. Olsen oqaatsivut pillugit ataatsimeersuarnermut ima qulequtalimmut: “Oqaatsitta atugaaneranni ilinniartitsissutaanerannilu anguniakkat najoqqutallu” marsip 29-ani, 30-anilu 2023 kattuffiit, peqatigiiffiit, pisortaqarfiit, suliffeqarfiit, tusagassiuutit, ilinniarfiit, atuarfiit, kommunit, naalakkersuisoqarfiit oqallinnissamut oqaatitsinnillu nukittorsaaqataasussanik allanik qaaqqusivoq.
Ataatsimeersuarneq ulluni marlunni ingerlanneqassaaq peqataasut saqqummiisussallu 100-t missaanniittut tamatuminnga tunngavileeqataassallutik, tamannalu Hotel Hans Egedemi Nuummi ingerlanneqassalluni. Siunertaavoq kalaallit oqaasiisa atugaanerat nalilersuiffigissallugu siunissamilu qanoq ineriartortinneqarnissaat inassuteqaateqarfigissallugu. Siorna oktobarimi oqaatsit pillugit isumasioqatigiinnerup ataatsimeersuarneq malitsigivaa.
Naalakkersuisut isumaqarput kalaallit oqaasii tammatsaaliinnarnagit aammali eqqarsaatigilluakkamik ineriartortinneqarnissaannut isumaliutiginnittoqarlunilu innersuussisoqarnissaa pisariaqavissoq. Taamaattumik Naalakkersuisut kissaatigaat inuiaqatigiinni oqaatsit pillugit susassaqartut ingerlatsisullu ataatsimeersuartinneqassasut.
Kalaallit oqaasii qangamut naleqqiullugit tatisimaneqannginnerusutut ikkaluartut siunissamut qanoq allanngoriartornissaannut ineriartortinneqarnissaannullu tunngasut tamanit sammineqartanngillat. Piffissanngorsorinarpoq immitsinnut aperinissarput: Oqaatsivunuku qanoq ineriartortinniarivut, sumullu atorniarpavut?
Avataaniit allamiut oqaasiinit sunnigaanerput aatsaat taama ingasatsigilerpoq, taamaattumik piffissanngorpoq oqaatsitta atugaanerat pillugu pisortatigut sunniuteqarfigineqarsinnaasut isummersorluarfigineqarlutillu politikkikkut suliniutissanik inassuteqartoqarnissaa.
“Nuannaarutigaara ataatsimoorluta oqaatsivut pillugit ukkatarinneqatigiissinnaagatta, sammisassarput tassaammat uannut aamma pingaaruteqarluinnartoq ”, taama oqarpoq Naalakkersuisut Peter P. Olsen.
Qarasaasiaq atorlugu Naalakkersuisut facebookiatigut aamma KNR 2-kkut isumasioqatigiinnermi malinnaanissamut periarfissaqassaaq. Ataatsimeersuarneq toqqaannartumik tuluttut nutserneqartussaavoq, periarfissaassaarlu KNR TV-p Youtubekkut kanaaliatigut nutsikkap malinnaaviginissaa.
Annertunerusumik paasisaqarusukkuit attavigiuk: Immikkoortortami pisortaagallartoq Pia Lynge, Oqarasuaat 34 5000, pily@nanoq.gl