Nakorsatut ilinniartitaanermi modulit nunatsinnit tiguneqartut

Nakorsat nalinginnaasumik nakorsaanermik immikkut ilisimasalittut ilinniartut, ilinniarnerup immikkoortuisa ilaat pikkorissaanerit, Danmarkimi ingerlanneqartaraluit maanna nunatsinni ingerlanneqarsinnaanngorput.
Nalinginnaasumik nakorsaanermi immikkut ilisimasalittut ilinniarneq ukiunik tallimanik sivisussuseqartoq, tamakkerluni nunatsinni Peqqinnissaqarfimmi ingerlanneqarsinnaavoq. Nakorsap immikkut
ilisimasalinngorniap, Dronning Ingridip Napparsimmavissuani immikkoortortani sinerissamilu qitiusumik napparsimmaviit arlaanni arlalinniluunniit ilinniarnini ingerlatissavaa. Nakorsap immikkut ilisimasalinngorniap pikkorissaanerit nalinginnaasumik nakorsaanermi immikkoortunut tunngasut peqataaffigissavai.
Pikkorissaanerit taakku pinngitsoorani peqataaffigisassaapput, mannalu tikillugu Danmarkimi ingerlanneqartarsimallutik.
Pikkorissaanerit arlallit, nunatsinni ingerlanneqarsinnaanngorlugit Peqqinnissaqarfimmit tiguneqarput.

”Pikkorissaanerit, Danmarkimi pikkorissaanerit assigaat aammali nunatsinni pissutsit immikkut ittut ukkanneqarlutik, ” Gert Mulvad Peqqinnissaqarfik Sermersuumi nakorsaq, nunatsinnilu Peqqinnissaqarfimmi nalinginnaasumik nakorsaanermik immikkut ilisimasalittut ilinniartitaanermut akisussaasoq, oqaluttuarpoq. 

Nammineq nakorsarisanik immikkut ilisimasalinnik piginnaasatigut inerisaaneq nunatsinniinnerlu Peqqinnissaqarfiup nakorsai immikkut ilisimasallit, ilinniartitsinermikkut piginnaasatigut imminnut
qaffassassasut, Gert Mulvadip oqaluttuaraattaaq.
Nunatsinni Peqqinnissaqarfimmi ilinniartitsisuussapput:

• Michael Lynge Pedersen, nappaatit anigugassaanngitsut kiisalu nalinginnaasumik nakorsaanermi qarasaasiarsorneq
• Peqqinnissaqarfik Sermersuumi nakorsatut pisortaq Jesper Olesen, pisortanik allanik suleqateqarneq najukkamilu peqqinnissamik siuarsaaneq
• Gitte D. Hansen, isikkut nappaatit
• Nikolaj Hardenberg & Ramon G Jensen, siutikkut, qinngakkut toqqusaakkullu nappaatit
• Nunatsinni Nakorsaaneq Henrik L. Hansen & Gert Mulvad inuiaqatigiinni pissutsinik tunngaveqartumik nappaateqalersarneq – suliffimmilu avatangiisit peqqissutsillu ataqatigiinnerat, kiisalu inuttut atugarisat peqqisutsillu imminnut ataqatigiinnerat.

Sapaatip akunneranik sivisussuseqassaaq Syddansk Universitetimilu nalinginnaasumik nakorsaanermik immikkut ilisimasalittut ilinniartitaanerup naammassineqarneranut akisussaasuuvoq naggataagullu sulisinnaatitaanermut uppernarsaammik tuniussisoqarnissaanik qulakkeerusuulluni.

” Danmarkimi immikkut ilisimasaqarnermut tunngatillugu qanoq pisoqarneranik ilisimasaqartuarnissaq, nunatsinnilu pissutsinik ukkassinissaq suli pingaaruteqarpoq,” Gert Mulvad erseqqissaavoq imalu naggasiilluni:
”Nunatsinnut nuussineq nunatsinniinnerunermik- napparsimasunut iluaqutaasussamik kinguneqassaaq, nunatsinnilu pissutsinik ilinniartitsineq nakorsanut kingorna nunatsinni Peqqinnissaqarfimmi sulilersussanut pingaaruteqarluni.”

Nalunaarut una pillugu paasissutissat uunga attaveqarnikkut pissarsiarineqarsinnaapput: Sundhedsledelsen@peqqik.gl