Pilluaqqussut

Januaarimi paasivarput filmeeraliaq ”Ivalu” Academy of Motion Pictures Arts and Sciences-p nersornaasiuttagaanut Oscarimut immikkoortortami ”Academy Award for Live Action Short Film”-imut innersuunneqarsimasoq. Filmeeraliaq danskit kalaallillu filmiliortartui suleqatigiinnerisigut suliaavoq. Filmeeraq nunatsinni immiussaavoq isiginnaartitsisuilu aamma nunatsinneersuullutik. Tamanna pillugu Naalakkersuisut sinnerlugit filmeeqqap “Ivalu”-p Oscarimut innersuunneqarneranut suleqataasut tamarmik, isiginnaartitsisui minnerunngitsumillu ilitsersuisui qamannga pisumik pilluangaaritsi.

Naalakkersuisuniit nuannaarutigaarput danskit kalaallillu filmiliortui filmeeqqap pilersinneqarnissaanut suleqatigiissimanerat takullugu. Mannalu angusaq annertoq! Naalakkersuisuniillu neriuutigaarput innersuunneqarsimanersi nununatsinni isiginnaartitsisartutsinnut minnerunngitsumillu filmiliortartutsinnut pitsaasumik sunniuteqarumaartoq, aammalu nunatta nunallu tamalaat akornanni filmiliornerup silarsuaani suleqatigiinnermik annertunerusumik matunik ammaassiumaartoq.

Filmeeraliarsi nersornaasigassatut innersuunneqartoq meeqqanik atornerluisarnernut nunarsuatsinni tamarmi nunatsinnilumi annertuumik ajornartorsiutigineqartunut tunngassuteqarpoq. Tassani pissutsit paquminartillugillu eqqortiffigisagut sammineqarput. Filmeeraliarsi aqqutigalugu meeqqat nipaat ersersikkassiuk qujanaq.
Sapaatiummat marsip 12-ani 2023 Oscarimik nersornaasiisoqarneranut toqqaannartumik aallakaatinneqarnerani pissangalluta malinnaarrappugut. Assullu tulluusimaarpugut oqaluttuarisaanermi aatsaavissuaq kalaallit peqataaffigisaanik filmeeqqamik innersuunneqartumut peqataasoqarnera takullugu.

Uummammit pisumik suliarsi pillugu pilluangaaritsi, siunissamilu ajunnginnerpaamik tamassi kissaappassi.

Peter Olsen
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq