Mimi: Napparsimasut pitsaanerusumik katsorsarneqarnissaat qulakkeerneqassaaq

Kalaallit Nunaanni Peqqinnissaqarfik peqqinnissaqarfimmi sulisussanik, minnerunngitsumik nakorsanik misilittagalinnik amigaateqartarnermigut unammilligassaqarpoq.

Nakorsassaaleqineq ukiorpassuarni annertuumik unammilligassaasimavoq. Tamanna taartaasartunik atorfinitsitsiortornermik imaluunniit nakorsat atorfiisa inuttaqannginnerannik kinguneqarpoq. Nakorsanik misilittagalinnik aalajangersimasunik, pingaartumik Nuup avataani atorfinitsitsinissaq ajornakusooriartuinnarsimavoq. Unammilligassaq tamanna ukiuni tulliuttuni aggersuni anneruneruleraluttuinnarniarpasippoq.

Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen oqarpoq:”Nunani Avannarlerni nunat allat assigalugit nakorsat sulisoriinnarnissaannik nakorsanillu sulisussarsiornermik unammilligassaqarpugut. Massakkorpiaq nunap immikkoortuini pingasuni aalajangersimasunik nakorsanik immikkut ilisimasalinnik atorfeqartoqanngilaq, tassami ataatsimut isigalugu nakorsat immikkut ilinniarsimasut ataavartut Nuummi katersuussimammata.

Nakorsiartup pitsaanerpaamik atugaqarnissaa eqqarsaatigalugu katsorsaaneq ingerlanneqassaaq.
Taamaammat suliniutit aalajangersimasut pingasut aallartinneqassapput:

1. Kalaallit Nunaat tamakkerlugu nakorsanut inuusunnerusunut taartaasartunullu ikorfartuinermut qulakkeerinnittussamik nakorsat immikkut ilisimasallit aalajangersimasut pigaartuusarnissaannik aaqqissuussinissaq sulissutiginiarneqarpoq.
2. Nunap immikkoortuini nalinginnaasumik sulinerup nukittorsarneqarnissaa sulissutigineqarpoq, taamaalilluni innuttaasut ulluinnarni nappaatiminnik iliuuseqarfiginninniarnerannut atatillugu pisariaqartitaannut tunngatillugu pitsaanerusumik iliuuseqartoqassammat.
3. Innuttaasut sapinngisamik piaartumik eqqortumik katsorsarneqarnissaat qulakkeerniarlugu pinasuartumik pilattaasarnerit qitiusumut katersornissaat sulissutigineqarpoq.

“Sinerissami sulisussaaleqinermi peruluttut Nuummukartittarnerisigut imaluunniit Qallunaat Nunaannut katsorsaanermi pitsaassuseq pitsaanerpaamik qulakkeersinnaavarput, tassami piginnaasaqarluartut nakorsat immikkut ilinniarsimasut aammalu suliamik ilisimasallit allat pinngitsoorneqarsinnaanngitsut atortullu pisariaqartinneqartut taakkunaniimmata.
Innuttaasunut iluaqutaasussamik pitsaanerpaamik aaqqiissutissamik nassaarnissaq siunertaralugu peqqinnissaqarfimmik oqaloqateqartarnera ingerlateqqissavara. Peqqinnissaqarfimmi sulisussaaleqinerup nunarput tamaat sunnerpaa, taamaammallu suliniutaasinnaasut aaqqiissutaasinnaasullu pillugit nunatsinni borgmesterit qanimut oqaloqatigisarpavut”, taama Mimi Karlsen oqarpoq.


Paasisaqarnerorusukkuit naalakkersuisumut allatsi Frederik Kristiansen e-mailikkut: frek@nanoq.gl-imut oqarasuaatikkulluunniit + 299 34 56 85-imut attavigiuk