NunaGIS nutaap tamanut saqqummiunneqarnera

NunaGIS nuna tamakkerlugu nunap assinganut paasissutissanik nunallu issusaanut paasissutissanut isaariaavoq. Isaariaq nutarterneqarpoq, nutartigarlu ullumi ulloq 2. marts tamanut saqqummiunneqassaaq.

Isaariaq sumik imaqarpa?

• Nunap assinganik nunallu assinganik paasissutissanik takutitsivik, tassani Kalaallit Nunaannut nunap assingi nutaat saqqummiunneqaqqammisut ilanngullugit.
• Namminersorlutik Oqartussat tigussaasunik pilersaarusiornermi soqutigisaannut, nunatsinnilu kommunit pilersaarusiornerannut sanilliullugu nunaminertanik aqutsineq, soorlu umiarsualiveqarfiit, mittarfeqarfiit, imeqarfinnullu killeqarfiit.
• Nunatsinni nunap sermertaqanngitsoq tamakkerlugu 3D-mik takussutissiaq. Takussutissaq interaktiviuvoq, internetbrowserikkullu misissorneqarsinnaalluni.
• Nunaminertanik atugassanik qinnuteqartarfik kiisalu nunaminertat atugassanngortinneqartunut takussutissiivik.
• Nunap assingi nunallu assinginut paasissutissanik sammisakkaartumik takussutissiivik, assersuutigalugu ilikkarsarneq, inuussutissarsiutit, siuariartorneq imaluunniit digitalinngorsaaneq.

Nunap assingi nunallu assinginut paasissutissat ataatsimut katersornissaat isaarissap siunertaraa. NunaGIS nutaaq nunap assinginik nioqqutissanut nutaanut atugassiivoq, nunarpullu nunallu ilusaa pillugu paasissutissanik naapertuuttunik paasiuminartumik atuisunullu pisariitsumik katersuisuulluni. Isaariaq atuisunut assigiinngitsunut saaffiginnittuuvoq, taamaammallu innuttaasunut ataasiakkaanut, suliffeqartunut politikikkullu ingerlatsisunut nunap atorneqarnissaanik pilersaarusiortunut atorneqarsinnaasuulluni.

”Ukiuni makkunani qarasaasiap atuuffiani paasissutissanik sukkasuumik pisariitsumillu pissarsisinnaanerput naatsorsuutigisarparput. Tamanna suliatsinnut oqilisaassisuuvoq, immaqalu aamma inuup inuuneranik annaassinermik nassataqarsinnaalluni. NunaGIS nutaaq Namminersorlutik Oqartussat kommunillu ataqatigiissaarinerannut sakkuuvoq pingaarutilik. Namminersorlutik maanna ingerlatsisunut siunissamilu ingerlatsilersussanut taanna sakkussaavoq pingaarutilik, taannattaaq annertusiartortumik sunngiffitsinni sakkutut atugaraarput. Nunap assingi paasissutissallu pitsaanerusut tamatsinnut periarfissanik pitsaanerusunik tunisisuupput.” Aningaasaqarnermut Naligiissitaanermullu Naalakkersuisoq Naaja H. Nathanielsen oqarpoq.

NunaGIS ugguuna iserfigineqarsinnaavoq www.nunagis.gl/

Attaveqarfissaq:Immikkoortortami pisortaqThomas Gaarde Madsen, Toqq/direkte 34 50 00, thga@nanoq.gl