Utoqqaat pillugit suliassaqarfimmi ataqatigiinnerusumi akisussaassuseqartumik inuiaqatigiinni aningaasaqarnikkut aqutsineq periusissiami nutaami ukkatarineqarpoq

Utoqqaat ataqqinarnerusumik pitsaanerusumillu inuuneqarnissaat aallaavigalugu utoqqaat pillugit suliassaqarfimmik ataqatigiinnerusumik pilersitsinissaq Naalakkersuisut utoqqaat pillugit periusissiaanni anguniagaavoq. Peqatigalugu inuiaqatigiinni aningaasaqarnikkut unammilligassat, inuiaqatigiit inuuneqqortusiartortut pilersitseqataaffigisaat, naapinniarlugit periusissiami ukkatarineqarpoq.

Naalakkersuisut utoqqaat pillugit periusissiaanni siunertaavoq utoqqaat pillugit suliassaqarfimmi pissutsit pitsaanerulersinniarlugit, sivisunerusumik suliffeqarnermiinnissamut annertunerusumik kajumissaarinerit, puiguttorneq pilllugu ukkataqarnerulerneq aamma inuiaqatigiinni innuttaasunik utoqqaanerusunik inuunermik sullissinermillu pitsaanerusumik aqqutissiuinissaq. Taamaattumik utoqqaat pillugit suliassaqarfimmi aaqqissuussap ilai suleriaatsillu naliliiffigeqqinneqassapput, sulineq sunniuteqarluarnerpaaq nassaarinissaanut periarfissanik ujartuilluni.

Periusissiaq ilanngullugu ungasinnerusumik isiginnittuuvoq, inuiaqatigiinni atugarissaartuni unammilligassat paasisimannilluarfiginissaat pisariaqarmat. Taamaalilluni utoqqaat pillugit suliassaqarfimmut tunngatillugu oqaloqatigiinnermik aamma sulinermik nangittumik periusissiaq aallaaviuvoq. Naalakkersuisut periusissiap akisussaaffigalugu akueraat aamma akisussaassusilimmik politikkimik ingerlatsisoqassasoq, kisianni Inatsisartuni partiit sapinngisamik tamarmiullutik utoqqaat pillugit suliassaqarfimmi suliniutit pisariaqartut sunniuteqataaffigissagaat akisussaaqataaffigalugillu Naalakkersuisut kissaatigaat.

”Utoqqaat pillugit periusissiamik matuminnga Naalakkersuisut piareeqqapput, siunissami atugarissaarnerput pitsaasumik pisariaqartumillu tunngavilernissaanut, inuiaqatigiit kalaallit aaqqissuuteqqinnissaannut. Naalakkersuisut akueraat utoqqaat pillugit periusissiami suliniutit amerlasuut inuiaqatigiinni annertuumik allanngortiterinermik piumasaqaateqartut. Taamaattumik anguniagaavoq kommunit, Naalakkersuisut aamma Inatsisartut akornanni isumaqatigiilluni suliniutit takkuttussat ataasiakkaat naleqqunnerpaamik ilusilersornissaat. Periusissiami imarineqartut piffissaq eqqorlugu takutinneqarnissaat inuiaqatigiinnilu naleqqussaanernut pisariaqartunut iluaqutaasussat. Utoqqaat pillugit suliassaqarfik maannakkut ilaatigut ajunngitsumik ingerlavoq, taamaattoq allatigut ingerlanerliorluni. Taamaattumik utoqqaat pillugit suliassaqarfik siunissamut piareersarnissaanut pisariaqartitsisoqarpoq.” Isumaginninnermut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.

Aningaasaqarneq inuiaqatigiillu atugarissaartut siunissami qaninnerpaami annertuunik unammilligassaqarput. Inuiaqatigiinni inuuneqqortusiartorneq peqatigalugu utoqqalinersiaqartut amerliartorput, sulisinnaasullu ikiliartorlutik. Aningaasartuutit annertusiartortut matussusersinnaasaannik suliniutinik arlalinnik iliuuseqartoqanngippat, pisortat isertitaat qaffannissaat naatsorsuutigineqanngilaq. Ineriartornerup katigunnerat naatsorsuutigineqartup ilaatigut inuiaqatigiinni aningaasaqarneq annertunerusumik tatisimalissavaa ilaatigullu peqqinnissaqarfimmik utoqqarnullu immikkoortut annertunerusumik tatisimalissallugit.

”Ukiuni tulliuttuni inuiaqatigiinni arlalinnik allanngortoqassaaq aamma inuiaqatigiit aningaasaqarnikkut unammillerneqassallutik, pigissaarneq atugarissaarnerlu qulakkeerniarlugit nutaanik aalajangiinernik pisariaqartitsisut aamma inuiaqatigiit atugarissaartut pillugit aqutsinitsinni annertuumik nalimmassartariaqartut. Inuiaqatigiinni ukioqqortusiartorneq utoqqaat pillugit periusissiap allanngortissinnaanngilaa, inuunermi atukkanut ilaammat. Siunissamili utoqqaat pillugit suliassaqarfimmi periusissiaq sulinermut sinaakkusiisinnaavoq. Periusissiami anguniagaavoq siunissami inuiaqatigiinnik atugarissaartunik attassinissamut pisariaqartunik politikkikkut suliniutinik annertunerusumik siunnersuuteqarnissaq, taamaalilluni siunissami kinguaariit Kalaallit Nunaanni oqimaaqatigiittumi alliartorsinnaaniassammata. Naalakkersuisut naalakkersuisutut akisussaaffeqarnertik aalajangiusimavaat.” Isumaginninnermut, Suliffeqaarnermut Nunamullu Namminermut Naalakkersuisoq, Jess Svane oqaaseqarpoq.

Periusissiamik suliaqarneq naalakkersuisoqarfiit arlallit aamma kommunit akornanni suleqatigiinnikkut ingerlanneqarpoq. Tamatuma saniatigut utoqqaat pillugit suliassaqarfimmi suliamut paasisimasaqartut qitiusut paasisimasanik ikiuipput. Tamatumunnga utoqqaat pillugit suliassaqarfimmut tunngasunik saqqummersitsinernit ilisimasat attuumassuteqartut ilanngunneqarput.

Naalakkersuisut utoqqaat pillugit periusissiaat 2023-ip aallartinnerani piviusunngortinneqassaaq.

Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl oqarasuaatikkulluunniit + 299 34 56 11