AtuartigukIssittumi imarmiut inuussutissaalluarput pingaaruteqarmata
Nassiussisuuvoq: Aalisarnermut Piniarnermullu NaalakkersuisoqarfikTaama Aalisarnermut Piniarnermullu Naalakkersuisoqarfik Karl Tobiassen sinnerlugu EU-mi issittoq pillugu oqalliffik aamma nunap inuiisa oqaloqatigiiffianni Nuummi Katuami februaarip 8-anni aamma 9-anni 2023-mi isumasioqatigiittoqarmat oqaaseqarnermi oqarpoq.
“Neriuppunga maani Nuummi ataatsimiinnerput silarsuarmut avatitsinniittumut kiinnertarnitsinni ataatsimoornermut nutaamik nukissamik pissarsiviussasoq, tassami silarsuarmioqativut assut pingaarutilimmik puigugaqarsimapput, tassalu miluumasut imarmiut allatuulli inuussutissaalluarmata, kulturikkut kingornussaqarfiummata kiisalu Issittumi inuussutissaqarniarnermut assut iluaqutaammata, kiisalu nunarsuatsinni nunani ineriartorfiusuni ilaqutariippassuit perlerumanatik ullut tamaasa ilungersortariaqarfiini inuussutaalluarsinnaagaluarmata, niuernikkut killilersugaanngikkaluarpata.
Nunalerineq allatigullu suliffissuaqarneq Nunatsinni killeqaqimmata inuiaqatigiiusugut aalisakkanik uumasunillu nunanut allanut naleqqiulluta anneroqisumik isumalluuteqartuuvugut. Aalisakkat miluumasullu imarmiut nerisaraavut inuussutissaqarniarnitsinnilu toqqammavigalutigit. Erseqqissarneqartariaqarpoq pingaartumik miluumasut imarmiut inuussutissaqarniarneq imminullu pilersorneq eqqarsaatigalugu inuiaqatigiinnut assorsuaq pingaaruteqarmata. Miluumasut imarmiut pinngitsoorsinnaanngilavut, nerisaraavut, kinaassutsitsinnut kulturitsinnullu tunngaveqarput kiisalu aalisarnermik aalisakkanillu tunisassiornermit isertitanut tapertaalluartuullutik.”
Oqalugiaat tamakkiisoq uani atuarsinnaavat.
Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq, Amalie Jessen. E-mail: amalie@nanoq.gl