AtuartigukKalistat: Canadami inuit suleqatiginerusinnaavagut
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik7.-11. februaarimi ataatsimeersuarneq Northern Lights Ottawami Canadamiittumi, Inuit Canadap kangisissortaani najugallit tikeraartitsisoralugit ingerlanneqarpoq.
Tassanilu Naalakkersuisoq Kalistat Lund ataatsimeersuarnermi oqalugiartut pingaarnerit ilaattut oqariartuutimini Kalaallit Nunaata mingutsitsinngitsunut allannguiniarnera aammalu nunani tamalaani suleqateqalernissamut periarfissat aalluppai.
Kalistat Lund oqarpoq:
”Isumaqarpunga, Canadami Inuit, taakkununngalu Nunavummi naalakkersuisut ilanngullugit, suleqatigilernerat nunatsinnut Naalakkersuisunut naleqarluartussaasoq. Ajornartorsiutit assigiit amerlasuut suliaraagut, taakkununngalu nukissiorneq ilaavoq, ilisimasatsinnillu Nunavummiunut tapersiisinnaavugut, aammalu qanoq iliorluta tamatta immikkut suliniutivut, aammalu mingutsitsinngitsunut nuussinissamut pilersaarutivut pillugit tapersersoqatigiissinnaanerluta misissorsinnaavarput.”
Ataatsimeersuarnermi 1000-it sinnerlugit Amerikap avannaa tamakkerlugu peqataapput. Aamma Naalakkersuisoq nukissiorfiit, ingerlatseqatigiiffiit Inunnit pigineqartut aammalu Inuit najugaanni namminersorluni aqutsiviusuni politikerit ataatsimeeqatiginissaannut periarfissinneqarpoq. Tassunga ilanngullugu Naalakkersuisup Premier P. J. Akeeagok Nunavummeersoq immikkut taasassaasumik ataatsimeeqatigilluarpaa. Ataatsimiinnermi tassani ilaatigut siunnerfinnut nalunaarut, Memorandum of Understanding, siorna 26. aggustimi Naalakkersuisut Siulittaasuata Múte B. Egedep aamma Premier Akeeagok-p isumaqatigiissutigisaat sammineqarpoq. Ilaatigut Aamma MoU tunngavigalugu Nunavummi aamma Kalaallit Nunaanni nukissiornermik suliassaqarfiit akornanni suleqatigiinnermik qanoq iliorluni atuutsitsisoqalersinnaanersoq oqallisigineqarpoq.
Ataatsimeersuarnermi, ukiut allortarlugit aalajangersimasumik pisartumi Canadap avannarpasissortaani piffissami pisumi apeqqutit pingaarutillit sammineqartarput, issittumut tunngatillugu apeqqutit immikkut pingaartinneqarlutik.
Northern Lights conference pillugu: https://www.northernlights.events
Annertunersumik paasisaqarusunnermi attaveqarfissaq: Naalakkersuisumut allatsi Manasse Berthelsen, email: mabr@nanoq.gl, mobil 548868 aamma oq. 345603.