Vivian Motzfeldtimut EU-p issittoq Ataatsimeersuarnerani nunallu inuii pillugit oqaloqatigiinnermi annertuumik ataatsimeeqattaarfiusoq

EU-p Issittoq pillugu Ataatsimeersuarnerani aammalu Nunap Inuii pillugit Oqalliffimmi Nuummi februarip 8-ani 9-anilu ingerlanneqartumi Nunanut Allanut, Inuussutissarsiornermut Niuernermullu Naalakkersuisup ilaatigut aappassaaneersumik Danmarkip Nunanut allanut Ministeriat Lars Løkke Rasmussen ataatsimeeqatigaa. Tassani siammasissumik suleqatigiinneq oqaluuserineqarpoq. Qulequttat soorlu Issittoq, USA-mut attaveqarneq, pilersuinissamut qulakkeerinninneq, nunanik sanilerisanik attaveqarnerup ineriartornera oqaluuserineqarput. Tassunga atatillugu Canadap, Danmarkip Kalaallit Nunaatalu 2022-mi killeqarfiit pillugit isumaqatigiissutaat atsiornikoq Lars Løkke Rasmussenimit Vivian Motzfeldtimut tunniunneqarpoq nunatsinni paarisassanngorlugu.

Savalimmiormiut Nunanut allanut, Inuussutissarsiornermut Niuernermullu Lagmandia nutaaq Høgni Hoydal Vivian Motzfeldtip siullermeersumik ataatsimeeqatigaa. Taakku marluullutik oqaluuseraat suleqatigiinnerup annertusinera ministerillu suliassaqarfiini akisussaaffiit pillugit paasissutissanik avitseqatigiipput – tassunga ilanngullugit niuerneq takornariaqarnerlu. Ataatsimiinnermi Høgni Hoydalip Savalimmiut Reykjavikimi sinniisoqarfiup pisortaata Kalaallit Nunaannut aamma atassuteqalernissaanut kissaat tunniuppaa, ilutigalugulu Vivian Motzfeldt Savalimmiunut aggersarlugu.

EU-p Issittoq pillugu Ataatsimeersuarnerani aammalu Nunap Inuii pillugit Oqalliffimmi Naalakkersuisut Europa-Kommissionen suleqatigalugu aaqqissuussaraat, siullermeersumillu Kalaallit Nunaanni ingerlanneqarluni, tamatumunngalu atatillugu Aalisarnermut, Imavissuarnut Avatangiisinullu Kommissær Virginius Sinkevicius Nuummut tikippoq. Kommissær Virginius Sinkevicius Europa-Kommissionimi Issittoq pillugu politikkikkut akisussaavortaaq. EU Issittoq pillugu politikkiat 2021-mi saqqummersoq ilaatigut Sinkevicius-ip kisussaaffiisa ilagaat. Uani ilaatigut oqaatigineqarpoq EU pilersaaruteqartoq Kalaallit Nunaanni EU-p Allaffianik ammaanissamik pilersaaruteqartoqartoq. EU-p Kalaallit Nunaatalu akornanni pitsaanerusumik suleqatigiinnerup eqqartornerta saniatigut Kommissær Sinkeviciusip Vivian Motzfeldtillu allaffittaarnissaq 2023-p ingerlanerani ammarneqartussatut naatsorsuutigineqartoq oqaloqatigiissutigaat.

Nunanut Allanut, Inuussutissarsiornermut Niuernermullu Naalakkersuisup ambassadørit aammalu FN-ip nunap inuiisa pisinnaatitaaffii pillugit immikkut nalunaarusiortartua EU-p Issittoq pillugu Ataatsimeersuarnerup ingerlanerani ataatsimeeqatigai.

Vivian Motzfeldt ima oqaaseqarpoq:
”Ataatsimeersuarneq qulequttanik soqutigisartunik imaqartoq ulapaarfiulluarpoq – tassunga ilanngullugu inuusuttunik suleqateqarneq, EU-mik pitsaasumik suleqateqarnitsinnut takussutissiilluaqataasoq. Ukiut tamaasa EU Kalaallit Nunaannit aalisagartassinneqartarpoq, illuatungaatigullu EU-mit aalisarnermi suliaqarfinnut, ilinniartitaanermut – maannalu minguitsumik ingerlatsinermut ilisimatusarnermi, uumasut assigiinngisitaarnerinut, nukissiuutit ataavartut il.il. pillugit aningaasaliissutinik pissarsissutigisarlutigit. Ataatsimeersurnermi matumani nunat allat aallartitaat assigisaallu naapinnissaannut periarfissinneqarpunga, tassanilu suleqatigiinneq qulequttallu maanna pisunut attuumassutillit oqaluuserisarlutigit, kunngeqarfimmi issittormiutuaasut tassaammata inuiaat Kalaallit.”

Paasisaqarnerurusukkuit attaveqarfigiuk naalakkersuisoqarfiup pisortaa Mininguak’ Kleist e-mailikkut: mikl@nanoq.gl oqarasuaatikkulluunniit + 299 34 51 48.