AtuartigukNannunniarnermi malittarisassat atuuttut eqqaassitsissutigineqartut
Nassiussisuuvoq: Aalisarnermut Piniarnermullu Naalakkersuisoqarfik
Nannunniarnermut piffissamut matumani ingerlanneqartumut atatillugu malittarisassat atuuttut Aalisarnermut Piniarnermullu Naalakkersuisoqarfimmiit matumuuna eqqaassitsissutigineqassapput.
Nannunniarnermi piniariaatsit sumiiffimmi pissutsit apeqqutaatillugit sumiiffimmiit sumiif-fimmut assigiinngissuteqarsinnaasarput. Sumiiffiit ilaanni qimussimik nannunniartoqartarpoq sumiiffinnilu allani umiatsiaaqqamik nannunniartoqartarluni. Qamutit motoorillit, qamuteralaat ATV-llu nannunniarnermut atornissaat inerteqqutaavoq, soorlut-taaq nannunniarfimmut nannunniarfimmiillu assartuinermut atornissaat inerteqqutaasoq.
Sikusartuni nannunniarnermi periuuserineqalersimasoq qassutinik puisinniarnermut atatillugu puisip amia tiguinnarlugu nannunik qammaaneq imaluunniit narajaaneq siunertaralugu puisip sinneranik qimatsinerup inerteqqutaanera Naalakkersuisoqarfimmiit erseqqissaatigissavarput. Tassunga atatillugu puisinniarnermi pisap neqaata, orsuata allallu atorsinnaasut tamarmik angerlaanneqartarnissaat imaluunniit qimatulineqartarnis-saat Naalakkersuisoqarfimmiit aammattaaq eqqaassitsissutigineqarpoq.
Nannunniarnermi aamma puisinniarnermi malittarisassat atuuttut taaneqartut nalunaaruti-nit ukunannga tunngaveqarput: Nannunik piniarneq illersuinerlu pillugit Namminersorlutik Oqartussat nalunaarutaat nr. 3, 14. septembari, 2018-imeersoq aamma Puisinik illersuineq piniarnerlu pillugit Namminersorlutik Oqartussat nalunaarutaat nr. 16, 12. novembari, 2010-meersoq. Nalunaarutini aalajangersakkanik unioqqutitsinerit akiliisinneqarnermik aam-ma/imaluunniit pisanik arsaarinninnermik kinguneqarsinnaapput.
Sukumiinerusumik paasisaqarusukkaanni immikkoortortaqarfimmi pisortaq Amalie Jessen saaffigineqarsinnaavoq, e-mail: amalie@nanoq.gl, tlf. +299 34 53 04.