AtuartigukPeqqinnissaqarfimmut pinasuartumik aningaasaliineq
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen (IA) peqqinnissaqarfimmi nutaanik pitsanngorsaaniarnermut atugassanik pinasuartumik aningaasaliinissamut Aningaasaqarnermut Akileraartarnermullu Ataatsimiititaliamit akuersissummik tunineqarpoq.
Nassiussisuuvoq: Peqqissutsimut Naalakkersuisoqarfik
Pinasuartumik aningaasaliinerit ukununnga atorneqassapput
- Nutaamik MR-scanneritaarnissamik aningaasaliinissamut,
- Dronning Ingridip Peqqissaaviani sullissinermik pitsanngorsaanissamut aamma
- seeqqukkut siffissakkullu suliaritinnissanut utaqqisut allattorsimaffianniittut ikilisarnissaannut
Mimi Karlsen oqarpoq:
”Pitsanngorsaaniarnermut aningaasaliissutit 6,5 mio. koruunit seeqqukkut siffissakkullu suliaritinnissanut utaqqisut allattorsimaffianniittut ikilisarnissaannut atorneqassapput. 3,5 mio. koruunit Nuummi nakorsat sullissinerisa pitsanngorsarnissaanut aamma nutaamik MR-scannerimik pisiniarnermik aallartisaanissamut atorneqassapput. Neqeroortitsinerup kingorna scannerip akivia aatsaat ilisimalissavarput”.
MR-scanneri nutaaq
Dronning Ingridip Napparsimmavissuani MR-scanneri 2012-mi pisiaq nutaanngilivoq, tamatumalu kingunerisaanik piffissap ingerlanerani assit pitsaassusiat ajorsiartorpoq.
MR-scannerinermi assit timip pisatai saarngup ipiusanik avatangerneqarsimasut assilineri takutinneqartarput. Teknikkilu atorneqartoq qaratsap, qiteqqap aammalu avatillu angisuut aqitsortaannik - soorlu tuip seeqqullu peqittarfiannik – taakkualu eqqaanniittunik takunnissinnaanermut immikkut tulluartuuvoq. MR-scanneri napparsimasut misissuiffigeqqaarnissaannut atatillugu atortussaavoq pingaarutilik.
Ilaatigut kræftimik napparsimasut misissorneqaqqaarnerannut nakkutigineqarnerannullu atatillugu MR-scannerimik pisariaqartitsineq annertusiartorpoq. MR-scannerimik nutaamik pisinikkut peqqinnissaqarfiup isumalluutaasa ataatsimut isigalugit annertusineqarnerisigut napparsimasut misissuiffigineqarnerat sukkanerulissallunilu isumagilluarneqarnerulissaaq.
Mimi Karlsen oqarpoq:
”Nutaamik MR-scannereqalernikkut napparsimasut amerlanerit pitsaanerusumik sullinneqartalernissaat neqeroorutigisalersinnaavarput. Assit atorlugit suussusersisarnermi atortut eqqarsaatigalugit MR-scanneri nutaanerpaaq peqqinnissaqarfiup ingerlariaasianik pitsaanerpaanngortitsissaaq. Napparsimasut nappaataannik suussusersinissamut tamanna annertuumik iluaqutaavoq, tamatumanilu sukkanerusumik pitsaanerusumillu katsorsaanissaq periarfissaalissaaq”
Nangillunilu oqarpoq:
”Peqqinnissaqarfik siunissami suli amerlanerusunik MR-scannerimik misissuisalerniassammat peqqinnissaqarfiup pitsaanerpaanik atortoqarnissaa pisariaqartinneqartunullu malinnaasinnaanissaa kissaatigaara. Peqqissutsimut Aqutsisoqarfiup pisiniarneq piaartumik aallartissavaa atortoq nutaaq 2023-mi upernaakkut atorneqarsinnaalerniassammat.”
Dronning Ingridip Peqqissaavianut attaveqarniarnerup pitsanngorsarneqarnera
Nuummi Peqqinnissaqarfimmut, Dronning Ingridip Peqqissaaveqarfia aqqutigalugu, isersinnaaneq taamaallaat oqarasuaat 801111 (siusinnerusukkut nakorsamut sianerfiusartoq) aqqutigalugu pisinnaavoq. Tassungalu saaffiginnittarnerit amerlapput amerliartuinnarlutillu taamaattumillu oqarasuaatikkut siarnguttut sivisoorujussuarmik utaqqisarlutik. Piffissami aggersumi Dronning Ingridip Peqqissaavianut attaveqarniarneq sulisut amerlinerisigut pitsanngorsarneqassaaq.
Mimi Karlsen oqarpoq:
”Nuannaarutigaara innuttaasut peqqissaavimmut attaveqarniarnerisa pitsanngorsarneqarnissaanut maanna aningaasaliisinnaagatta. Ukiuni arlalinni Nuummi innuttaasut amerlassusiisa qaffakkiartuinnarsimanerat qularutissaanngilaq. Taamaattumillu sulisut innuttaasunik sullissisussat amerlisinneqarnerat pissusissamisoorpoq.”
Suliaritinnissamut utaqqisunik ikilisaaneq
Utaqqisut allattorsimaffianniittut ataasiartumik immikkut 6,5 mio. kr.-ninik aningaasaliissuteqarnikkut ikilisarniarneqarput. Pilattaasartunik sungiusaasartunillu immikkut ilisimasalinnik angalasartoqatigiinnik pilersitsinikkut nunatsinni suliarinnittarnerit aallartinnissaat periarfissaqarnersoq imaluunniit napparsimasut eqimattat Danmarkimut napparsimmavimmut aallartinnissaat tulluarnerpaajunersoq Peqqissutsimut Aqutsisoqarfiup maanna nalilersuiffigissavaa.
2022-mi septembarip aallaqqaataanni Peqqinnissaqarfimmi seeqqukkut siffissakkullu suliaritinnissanut utaqqisut allattorsimaffianniittut:
| 1. september 2022 Saanernik pilattaanernut Immikkoortortaqarfimmi utaqqisut allattorsimaffianniittut |
Nuummi DIN-ni utaqqisut allattorsimaffianniittut |
Nunatta sinnerani utaqqisut allattorsimaffianniittut |
Katillugit |
|---|---|---|---|
|
1. september 2022
Saanernik pilattaanernut Immikkoortortaqarfimmi utaqqisut allattorsimaffianniittut Seeqqulersilluni suliaritinnerit (seeqquusalertinnerit)
|
Nuummi DIN-ni
utaqqisut allattorsimaffianniittut 410
|
Nunatta sinnerani
utaqqisut allattorsimaffianniittut 6
|
Katillugit
416
|
|
1. september 2022
Saanernik pilattaanernut Immikkoortortaqarfimmi utaqqisut allattorsimaffianniittut Siffialertilluni suliaritinnerit (siffiaasalertinnerit)
|
Nuummi DIN-ni
utaqqisut allattorsimaffianniittut 45
|
Nunatta sinnerani
utaqqisut allattorsimaffianniittut 0
|
Katillugit
45
|
Mimi Karlsen oqarpoq:
”Napparsimasut piffissami qanittumi seeqqukkut siffissakkullu suliartinissaanut sivikinnerusumik utaqqisalissapput. Neriuutigaarput immikkut iliuuseqarnerput amerlasuut anniaateqaratik ulluinnaat atuleqqikkumaaraat.”
Paasisaqarnerorusukkuit immikkoortortaqarfimmi aqutsisoq Aka Olesen e-mail: akol@nanoq.gl imaluunniit oqa. +299 34 66 69