Nakorsaatit Pissassaatitut Atorneqartarnerinut Kalaallit Nunaanni Akiuisut aqutsisuinut aamma Kalaallit Nunaanni Nakorsaatit Pissassaatitut Atorneqartarnerinut Akiuiniarnermut Ataatsimiititaliamut Naalakkersuisut toqqaapput.

Nakorsaatit Pissassaatitut Atorneqartarnerinut Kalaallit Nunaanni Akiuisut aqutsisuinut aamma Kalaallit Nunaanni Nakorsaatit Pissassaatitut Atorneqartarnerinut Akiuiniarnermut Ataatsimiititaliamut ilaasortassanik Naalakkersuisut toqqaapput, piffissami 1. november 2022 – 31. oktober 2026 atuuttussami.

Timersorneq timigissarnerlu pillugit Inatsisartut inatsisaat nr. 15, 6. juni 2016-imeersoq naapertorlugu Nakorsaatit Pissassaatitut Atorneqartarnerinut Kalaallit Nunaanni Akiuisut aqutsisuinut aamma Kalaallit Nunaanni Nakorsaatit Pissassaatitut Atorneqartarnerinut Akiuiniarnermut Ataatsimiititaliamut ukiuni sisamani ilaasortaasussanik Naalakkersuisut toqqaasussaapput.

Nakorsaatit Pissassaatitut Atorneqartarnerinut Kalaallit Nunaanni Akiuisut aqutsisui
Nakorsaatit Pissassaatitut Atorneqartarnerinut Kalaallit Nunaanni Akiuisut aqutsisuisa siunertaraat timersornermi timigissarnermilu nakorsaatit pissassaatitut atorneqartarnerinut akiuiniarnermi pinaveersaartitsineq, suliniuteqarnermilu angusassat, pitsaaliuinissaq, ataqatigiissaarinerullu ilusilersornissaa. Nakorsaatit Pissassaatitut Atorneqartarnerinut Kalaallit Nunaanni Akiuisut aqutsisui tallimanik ilaasortaqassaaq, timigissaatigalugu timersortartunit, pimoorutivillugu timersortartunit timersornermilu nakorsaatinut ilisimasalinnit sinniisuuffigineqartoq, taakkulu sinniisuutitaqarnissaat pisariaqartutut nalilerneqarpoq Kalaallit Nunaanni Nakorsaatit Pissassaatitut Atorneqartarnerinut Akiuisut suliassai pitsaasumik isumannaatsumillu suliarineqartarnissaat eqqarsaatigalugu. Kalaallit Nunaanni Timersoqatigiit Kattuffiat ataatsimiititaliamit atorneqarsinnaasumik allattoqarnikkut ikiuissaaq.

Nakorsaatit Pissassaatitut Atorneqartarnerinut Kalaallit Nunaanni Akiuisunut ilaasortassatut uku toqqarneqassasut:

• Ulrik Blidorf & Sara Biilmann, Kalaallit Nunaanni Timersoqatigiit Kattuffiannit inassutigineqartut
• Jannik Isidor & Christina Johnsen, Elite Sport Greenlandimit inassutigineqartut
• Gitte Drachmann Hansen, Nunatsinni Nakorsaaneqarfimmit inassutigineqartoq

Kalaallit Nunaanni Nakorsaatit Pissassaatitut Atorneqartarnerinut Akiuiniarnermut Ataatsimiititaliaq

Nakorsaatit pissassaatitut atorneqartarnerinut malittarisassanik unioqqutitsinerit pillugit Nakorsaatit Pissassaatitut Atorneqartarnerinut Kalaallit Nunaanni Akiuisut aalajangigaannut naammagittaalliuutit Kalaallit Nunaanni Nakorsaatit Pissassaatitut Atorneqartarnerinut Akiuiniarnermut Ataatsimiititaliap suliarisassavai. Kalaallit Nunaanni Nakorsaatit Pissassaatitut Atorneqartarnerinut Akiuiniarnermut

Ataatsimiititaliaq pingasunik ilaasortaatitaqarpoq. Naalakkersuisut ataatsimiititaliaq allattoqarfeqartissavaa.

Kalaallit Nunaanni Nakorsaatit Pissassaatitut Atorneqartarnerinut Akiuiniarnermut Ataatsimiititaliamut uku toqqarneqassasut:

• Marie Louise Frederiksen, Nunap eqqartuussisuuneranit inassutigineqartoq
• Jesper Søndergaard Olesen, Nunatsinni Nakorsaaneqarfimmit inassutigineqartoq
• Kista Isaksen, Kalaallit Nunaanni Timersoqatigiit Kattuffiannit aamma Elite Sport Greenlandimit inassutigineqartoq

Annertunerusumik paasisaqarusukkussi attavigiuk naalakkersuisup allattaa Rosa Thorsen, Telefon: +299 34 50 00 / 34 57 02, e-mail: rose@nanoq.gl