Peqqinnissaqarfimmi kræftimik katsorsaanermik periarfissat annertusipput

Ullumikkut innuttaasut kræftimik eqqugaasut pilatsillutik katsorsarneqarnissaminnik imaluunniit peqqissinissaq anguniarlugu nalinginnaasumik katsorsartinnikkut allatut neqeroorfigineqartarput. Katsorsaaneq napparsimasumut naammattumik iluaqutaanngippat, pisut ilaanni allatigut katsorsaanermik neqeroorfigineqartarput. Katsorsaanerit taamaattut ilaat peqqissinissaq anguniarneqartarpoq, pisunili allani katsorsaanermi anniarnaveersaartitsisoqartarpoq imaluunniit inuunermik sivitsorsaaniarneq anguniarneqartarpoq. Nunatsinnili katsorsariaatsit tarmarmik atorneqarsinnaasimanngillat.

Piffissami kingullermi Peqqinnissaqarfik aamma Peqqissutsimut Naalakkersuisoqarfik Nunatsinni kræftimik katsorsariaaseq nalilersorsimavaat, ilaatigut ukiuni kingullerni kræfti pillugu sukkasuumik ineriartornera misissorsimavaat. Tamanna tunngavigalugu Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen aalajangiivoq, juni 2023 tungaanut Danmarkimi inuit kræftimik katsorsartinneratulli Peqqinnissaqarfik katsorsaanerusalissasoq. Annertusisamik katsorsartinneq nunatsinni Danmarkimilu ingerlanneqassaaq. Siunissaq ungasinnerususoq eqqarsaatigalugu pissutsit, allaffissorneq aningaasaqarniarnikkullu kingunerluutit qulaajarumallugit, politikkikkullu eqqartorneqarsinnaaniassammat, suliniut manna pilerpoq.

Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen ima oqarpoq:
”Ilaquttatsinnik imaluunniit ikinngutitsinnik kræftimik eqqugaasimasumik amerlasuujulluta nalaataqarnikuuvugut, tamanna inummut, ilaqutaasumut qanimullu ikinngutaasumut sakkortuumik eqquisarpoq. Taamatut inissisimalluni pingaaruteqarpoq pissutsit atukkat aallaavigalugit pitsaanerpaamik katsorsartinnissamut neqeroorfigineqarsinnaaneq. 
Katsorsaanermi neqeroorut annertusineratigut Naalakkersuisut paasissutissat pisariaqartut pissarsiarissavaat, siunissamilu innuttaasut kræftimik katsorsariaatsit sorliit pissarsiarisinnaaneraat nalilersorneqarsinnaalissapput.

Tamatuma saniatigut Neriuffik katsorsaanermi neqeroorut annertusinera pillugu ilisimatippara pilersaarutigaarpullu kræfti pillugu suliassat ataatsimeeqatigiissutigeqqinniarlugit.”.

Sukumiisumik paasisaqarusukkuit naalakkersuisup allattaa Frederik Kristiansen e-mailikkut frek@nanoq.gl imaluunniit oqarasuaatikkut: +299 345000 attavigiuk