Ukiut pingasut ingerlareersullu atuarfiit pisortaasa isumasioqatigiinnerat siulleq

”Meeqqat atuarfiat ukiuni 20-ni” qulequtaralugu atuarfiit pisortaasa 2022-mi Hotel Hans Egedemi Ilinniartitaanermut Aqutsisoqarfiup isumasioqatigiisitsinerat Naalakkersuisup, Peter P. Olsen-ip peqataaffigaa. Isumasioqatigiinneq 29. novemberimiit – decemberip 1.-nut ingerlanneqarpoq. Covid-19-ip kingorna atuarfiit pisortaasa isumasioqatigiinnerisa siullersaraat:

”Covid-19-imik peqquteqartumik killilersuinerit ataatsimiinnerit tamaasa unitsimmatigilli kiisami pisariaqartumik taamaattumik aaqqissuussisinnaanngoqqippugut. Isumasioqatigiinneq manna inuttut aamma pissarsiaqarfigilluarpara. Nunatsinni meeqqat atuarfiinik tamanik ukkatarinninneq annertunerusariaqarpoq”, Peter P. Olsen oqarpoq.

Atuarfinnik iluarsartuusseqqinnerup ”Atuarfitsialaap” Inatsisartunit akuersissutigineqarneraniilli ukiut 20-t qaangiupput, peqqussullu 2003-mi atuutilersinneqarpoq. Tassunga atatillugu Naalakkersuisut 2023-mi meeqqat atuarfiat pillugu ataatsimeersuartitsineq aaqqissuutissavaat.

”Meeqqat atuarfiata atuagarsornikkut ilinniutit ilinniutinullu tunngasut kisiisa atuartunut atuartittassanngilai. Nipilersornikkut eqqumiitsuliornikkullu piginnaasaqarlualerumaartussat, aalisariutini naalaganngorumaartussat, ilinniartitsisunngorumaartussat, assassornermik ilinniagaqarumaartussat, IT-mik immikkut piginnaasaqalerumaartussat, takornariaqarnermik suliaqarumaartussat, professorinngorumaartussat il.il. atuarfiup isumassarsitittarlugillu perortittassavai”, Ilinniartitaanermut Naalakkersuisup tikkuussivoq nangillunilu:

”Sulisussanik ilinniarluarsimasunik inuiaqatigiit annertuumik pisariaqartitsipput. Inuiaqatigiit imminnut pilersorsinnaassuseqartut namminersortuusullu anguniassagutsigit, tamarmik – suiaassuseq, sumit kingoqqisuuneq tunuliaqutigisarluunniit apeqqutaatinnagu – assigiimmik naleqartinneqarlutik inuiaqatigiit ineriartornerannut tunniussaqarlutik misigisimassappata nutaamik eqqarsartariaqarpugut. Ilinniartitaaneq annertunerusumik inissaqartitsisoq, pineqartunullu qaninnerusoq minnerunngitsumillu ataqatigiinnerusoq pisariaqartipparput”, Peter P. Olsen oqarpoq.

Atuarfiit pisortaat, pisortanut tullersortit, efterskolet, Ado Lyngep Atuarfia, IMAK, Ilinniartitsinermik Ilisimatusarfik, ingerlatsivinni pisortat atorfeqartullu, kiisalu Ilinniartitaanermut Naalakkersuisoqarfimmi aamma Ilinniartitaanermut Aqutsisoqarfimmi atorfillit 98-it isumasioqatigiinnermi peqataapput, isumasioqatigiinnerlu una siulliuvoq ukiut pingasut ingerlaneranni.

Paasissutissanik annertunerusunik piniarnermi attavigineqarsinnaavoq naalakkersuisumut allatsi, Rosa Thorsen, rose@nanoq.gl +299553303

Tikilluaqqusilluni oqalugiaat uani atuarneqarsinnaavoq