Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt nunatsinni kaajallaalluni angalanini ingerlateqqissavaa

Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt nunatsinni kaajallaalluni angalanini ingerlateqqissavaa, angalanerlu tulleq 9. september Ilulissanut ingerlassaaq.

Nunatsinni kaajallaalluni angalanerup siunertaraa takornariartitsinermik inuussutissarsiutilinnik naapitsisarnissaq, Nunatsinni Takornariartitsinermut Periusissiap inaarsarneqarneranut atatillugu, kiisalu inuussutissarsiortut isummersuutaannik tusarniaaneq takornariartitsinermut inatsimmik nutaamik ilusilersuinermut atatillugu.

”Qilanaaraara nunatta avannaani takornariartitsinermik inuussutissarsiortunik naapitsisarnissara. Nunatta Avannaamiut ukiuni amerlasuuni takornariat nunarsuatsinni tamaneersut takornariarnissamut soqutiginnitissimavaat, Ilulissat Kangianilu takornariartitsinermut Illorsuup pilersinneqarneratigut, Ilulissani timmisartunut mittarfiup tallineqarneratigut, kiisalu misigisassarsiortunut nioqqutissianik nutaanik pissanganartunillu ingerlaavartumik ineriartortitsisarnikkut nunatta immikkoortua tamanna annertuumik siuariartortitsiviusussaavoq, suliffissanik amerlanerusunik pilersitsiviusumik aammalu nunat allamiut aningaasaannik suli annertunerusumik kaaviiaartitsiviusumik isaatitsiviusumillu. Qilanaaraakka oqariartuutit saqqummiussorneqartut tusarnissaat, tamakkualu peqatigiilluta ineriartortissavagut, nunatta avannaani najugaqartut pisariaqartitsinerannik isummersuutaannillu tunngavilimmik takornariartitsinikkut ineriartortitsiumalluta”, taama oqaaseqarpoq Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt.

9. september ulloq tamaat takornariartitsineq pillugu Ilulissani isumasioqatigiinneq - workshop - ingerlanneqassaaq, inuit 30-init amerlanerusut nunatta avannaaneersut peqataaffigisaannik, tunniussaqarfigisaannik aammalu siunissamut takornariartitsinerup ineriartortinnissaanut pingaartitat takorluukkallu oqallisigineqarfigisaannik.

Nunanut Allanut, Inuussutissarsiornermut Niuernermullu Naalakkersuisup aasap sinnerani ukialeqqaarneranilu nunatsinnik kaajallaalluni angalanini ingerlateqqissavaa.

Annertunerusunik paasisaqarumagaanni Nunanut Allanut, Inuussutissarsiornermut Niuernermullu Naalakkersuisoqarfik attavigineqarsinnaavoq ugguuna; isiin@nanoq.gl imaluunniit Naalakkersuisup allattaatsigut, Arnaruluk Lundblad email: alun@nanoq.gl imaluunniit oqarasuaatikkut +299 34 56 82