AtuartigukUpernaviup ukiunik 250-inngortorsiornera pinnguartarfimmik tunissuteqarnikkut malunnartinneqartoq
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Nunatsinni illoqarfiit pisoqaanersaasa ilaat, Upernavik, ukioq-manna ukiunik 250-inngortorsiorpoq. Malunnartinniarneqarneranut atatillugu illoqarfimmi nutaamik pinnguartarfiliortoqassaaq. Pinnguartarfik Naalakkersuisut illoqarfimmi innuttaasunut tunissutigaat, 2023-milu napparneqassasoq naatsorsuutigineqarluni. Illoqarfiup nalliuttorsiutigineqarneranut atatillugu Ineqarnermut Attaveqaasersuutinullu Naalakkersuisup Erik Jensenip tunissut tunniuppaa.
Ineqarnermut Attaveqaasersuutinullu Naalakkersuisoq Erik Jensen imatut oqaaseqarpoq:
”Upernaviup ukiunik 250-inngortorsiornerata malunnartinneqarneranut atatillugu illoqarfimmi innuttaasunut pinnguartarfimmik tunissuteqarsinnaagatta nuannaarutigaara. Illoqarfiup ukiunik taamak amerlatigisunik angusaqarnera malunnartinneqartariaqarpoq, neriuppungalu pinnguartarfik illoqarfimmi innuttaasunit nuannisarfigineqarluni atorluarneqarumaassasoq”.
Naalakkersuisut Upernaviup ukiunik 250-inngortorsiornerannut atatillugu pinnguartarfimmik tunissuteqarput. Assimi takuneqarsinnaasut tassaapput: Ineqarnermut Attaveqaasersuutinullu Naalakkersuisoq Erik Jensen, Aalisarnermut Piniarnermullu Naalakkersuisoq Karl Tobiassen kiisalu Upernavimmi najukkami ataatsimiititaliami ilaasortat.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl