Imminut toquttarnermik pinaveersaartitsiniarnermi inuusuttut namminneq oqariartuutaat Naalakkersuisut periusissaannut ilusilersueqataassapput

MIO-p suliaanit ”Qamani”-mit inuusuttut innersuussutaat periusissamut ilanngunneqarniassammata, imminut toquttarnermik pinaveersaartitsiniarnermi Naalakkersuisut periusissaannik upernaamut kinguartitsineq.

Ulloq 26. septembari suliamit “Qamani”-mit inernerit Meeqqat pisinnaatitaaffiinut sullissiviup MIO-p tamanut saqqummiutissavai, tassani inuusuttut nunatsinni sumiiffinni assigiinngitsuneersut imminut toquttarnerup qanoq pinaveersaartinneqarnissaanut innersuusiorsimapput. Inuusuttut namminneq oqariartuutaat periusissamut ilusilersueqataaniassammata oqallinnermilu inuusuttut nipaat pingaaruteqaqimmata, imminut toquttarnerup pinaveersaartinnissaanut periusissaq aggersoq ukiamiit upernaamut kinguartinniarlugu Naalakkersuisut aalajangersimapput:

”Imminut toquttarnermi kisitsisit amerlassusaat ikiliartunngillat. Amerliartorpulli. 2021-mi Kalaallit Nunaanni inuit 49-t imminnut toqupput, imminullu toqunniarlutik siorasaarutit 1.309-t politiinit tiguneqarsimapput. Inuit inuusuttut amerlasuut ajoraluartumik kisitsisini taakkunani ilaapput, tusarnaanngikkutsigillu imminut toquttarnermi kisitsisit ikilisinnissaannut iluatsitsinavianngilagut. Taamaammat suliamit “Qamani”mit inuusuttut oqariartuutaat periusissatsinnut nutaamut eqqarsaatigalugit ilanngunneqarnissaat uannut assut pingaaruteqartorujussuuvoq”, taama oqarpoq Meeqqanut, Inuusuttunut Ilaqutariinnullu Naalakkersuisoq, Mimi Karlsen.

Aggustip qaammataata aallartinnerani Meeqqat illersuisuat Aviâja Egede Lynge aamma Naalakkersuisoq Mimi Karlsen naapipput, tassani periusissami siunertarineqartut, tassaasut imminut toquttarnermi kisitsisinik ikilisitsineq aamma inunnik atugarliortunik siusinnerusukkullu imminut toqunnissamik eqqarsaateqartarsimasunik ikiuineq, anguniarlugit nukiit tamaasa ilanngunneqarnissaat pillugu periusissap kinguartinneqarnissaata pingaaruteqassusaa pillugu isumaqatigiipput. Imminut toquttarnermik pinaveersaartitsiniarnermi nuna tamakkerlugu periusissap ilusilersorneqarnerani inuusuttut nipaat katersorneqarsimasut amerlassusaat aatsaat taamak annertutigisumik ilanngunneqassapput Kalaallit Nunaannilu siullerpaamik taamatut pisoqassalluni. Naalakkersuisut inuusuttut nipaannik pimoorussimmata Meeqqat illersuisuata Aviâja Egede Lyngep tamanna assut qujamasuutigaa:

”Inuusuttut sinnerlugit assut qujamasuppunga. Taamaattussaammammi. Ukiuni arlalinngortuni pineqartut ilanngutitissagivut oqariartuutigisarsimavara. Aatsaat siullerpaamik inuusuttut namminneq innersuussutaannik ilanngussisimasumik imminut toquttarnerup pinaveersaartinnissaanut periusissaqalissaagut. Inuusuttut ilanngutitittussaatitaaginnarnatik aammali taakkuupput anniaatip sumiinneranik pisariaqartitamilu suunerannik nalunnginnittut, uagullu inersimasuusugut qanoq tapersersussanerivut, ikiussanerivut neriuuteqalerseqqillugillu. Suliaq “Qamani” aqqutigalugu inuusuttut nipaat katersorneqarsimapput. Unalu, Naalakkersuisoq inuusuttut nipaannik tusarnaaginnarani kisiannili aamma periusissiassamut innersuussutaannik immikkut iliuuseqarluni ilanngussinera uannut kissaataavoq annertooq piviusunngortinneqartoq. Meeqqat inuusuttullu suleqatigiinnikkut tusarnaassavagut iliuuseqarnikkullu oqinnerusumik aqqutissiuutissavagut”, taama oqarpoq Meeqqat illersuisuat, Aviâja Egede Lynge.

Ulloq 26. septembari Katuami aaqqissuussinertalimmi suliamit “Qamani”-mit inernerit tamanut saqqummiunneqassapput, tassani filmiliaq takuteqqaarneqassaaq, inersuarmi apeqqarissaarnertalimmik oqallinneqarluni, nipilersornermik ilanngussisoqarluni ammasumillu oqallittoqarluni. Tamatuma kingorna MIO-p nittartagaani inuusuttut innersuussutaat pissarsiarineqarsinnaanngussapput.

Attavissaq
Sukumiinerusumik paasissutissat pillugit naalakkersuisup allattaa, Tuperna Kristensen, saaffigineqarsinnaavoq, e-mailikkut: tukr@nanoq.gl imaluunniit oqarasuaatikkut: +299 34 55 83