Imarisassat tusarnaarlugit atuarlugitQaqqanik nakkutiginninneq Karrat kangerluani pilersinneqassaaq
Karrat kangerluani nakkutiginninermik pilersitsineq najoqqutaralugu qaqqami nunap sisooratarsinnaaneranut navianaatillit malinnaaffigineqassapput.
Nassiussisuuvoq: Aatsitassanut Inatsisillu Atuutsinneqarnerannut Naalakkersuisoqarfik
Aatsitassanut Inatsisillu atuutsinneqarnerannut Naalakkersuisoqarfiup qaqqanik nakkutiginninneq pilersinniarlugu suliniut ingerlappaa. Nakkutiginninneq kingusinnerusukkut ilimasaarinermut kalerrisaarinermullu atorneqarsinnaanngorlugu ineriartortinneqarsinnanera periarfissaqarpoq.
Ukiumut 2022-mut Karrat kangerluani suliamut atatillugu ineriartortitsinissaq aallarniutitut 4,4 mio. koruunit nalinganik aningaasaliissutigineqarpoq. Kigarsimap eqqaani qaqqamik navianaateqartumik nutaamik nassaarneq suliniummut uunga suli ilanngunneqanngilaq, suliniummulli ilanngunneqassasoq Naalakkersuisoqarfiup suliniutigaa. Pilersaarutit malillugit 2022-mi aasaanerani nakkutiginninnermut atortut ikkussorneqassapput taassumalu kingorna nakkutigisat misissoqqissaaneri aallartissallutik. Uani qaqqat allanngoriartornerat misissorneqassaaq (Nassuiaat takuuk).
Qaqqamik nakkutiginninneq pilersinniarneqartoq Kalaallit Nunaanni nakkutiginninnermi siullersaassaaq. Ajoraluartumillu atortunik piareeriikkanik pisiinnartoqarsinnaanngilaq, sumiiffinnullu assigiinngitsunut ilioraaginnartoqarsinnaanani. Sumiiffiit tamarmik nakkutiginninnermut maluginiutinik naleqquttunik naliliiffigineqaqqaartariaqarput, taamaattumillu nakkutiginninnermi periuseq ataaseq sumiiffimmit sumiiffimmut assilillugu ikkussorneqarsinnaanngilaq. Nunap sajunneranik aammalu qaqqat sisoortarnerinik nakkutiginninnerup iluani immikkut ilisimasallit pikkorissut uani suliami suleqatigineqarput.
Ilimasaarutit kalerrisaarutillu qaqugu atulerneqarsinnaanersut qularnaatsumik Naalakkersuisoqarfimmit oqaatigineqarsinnaanngilaq, taamaattorli inuiaqatigiinnut pisunut attuumassuteqartunut ineriartornerup ingerlarnganik ilisimatitsisarneq ingerlanneqarumaarluni. Tamatuma saniatigut ilimasaarinermut aammalu kalerrisaarinermut periutsinik pilersitsinissaq tuaviortumik suliniutigineqarpoq.
Paasissutissanik annertunerusunik piniarnermi Aatsitassanut Inatsisillu Atuutsinneqarnerannut Naalakkersuisoqarfik attaveqarfigineqassaaq, asn@nanoq.gl.
