Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

πŸ”ˆ Atuartiguk

Pikialasorsuaq tassaavoq kulturitta ileqquttalu pikialaarfiat

Imaani angalasinnaanerput kulturitsinnut inooriaatsitsinnullu pingaaruteqarluinnnarpoq. Tamanna Avanersuarmi Pikialasorsuup siulitta itsarsuarli ornittarsimasaasa eqqaaniittumi aamma atuuppoq. Sumiiffik pillugu paasissutissat ataatsimoortinneqarnerat kalaallisut maanna aamma saqqummerpoq, taamaalillunilu nunatsinni innuttaasut tamarmik paasissutissarpassuarnik pissarsisinnaanngorlutik.

Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik

Nunatta avannaarpiarsuani inuuneq ileqqullu Pikialasorsuarmi uumassuseqarnerup ataqatigiiffiinut attuumalluinnarput. Pikialasorsuaq pinngorarfissuuvoq. Uumasunut aalisakkanullu piniartakkatsinnut aalisartakkatsinnullu sumiiffik tamanna pingaarutilerujussuuvoq. Silalli pissusiata allanngoriartornerata Pikialasorsuaq kinguneranik allanngoriartorpoq.

- Avanersuarmi piniartut suli ileqquminnik ingerlatsipput, tamannalu kinaassutsitsinnik takutitsisuuvoq. Kulturip taassuma ingerlaannarnissaa ileqquttalu tulluusimaarutigisatta ingerlateqqinnissaannut atugassarititaasut pitsaanerpaanissaat Naalakkersuisut kissaatigaat. Sumiiffimmullu paasissutissat pingaarnerit pillugit nalunaarusiami nutaami sumiiffiup kulturiatalu siunissamut qularnaarnissaanut maanna periarfissaqalerpugut. Taama Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund oqarpoq.

Pikialasorsuaq pillugu nalunaarusiami imartuumi innuttaasut ilisimatuullu ilisimasaat katersorneqarput. Ilisimasallu pigineqareersut taamaalillutik nalunaarusiami takuneqariaannanngorput. Nalunaarusiami oqaatiginiarneqartut ilagaat Pikialasorsuarmut sunniutaanerpaassangatinneqartoq tassaasoq silap pissusiata allanngoriartornera. Sumiiffik tamaat paasilluassagaanni najugaqartut ilisimasaat pingaaruteqarluinnartut nalunaarusiami aamma ersarissarneqarpoq. Paasissutissarpassuit nalunaarusiami atuarneqarsinnaasut tunngavigalugit ineriartornermut tunngatillugu iliuuseqarsinnaassaagut, sumiiffiullu kulturillu atorluarnissaa illersorneqarnissaalu qularnaarlugu.

- Innuttaasut sumiiffimmi najugaqartut tusarnaarnissaat peqataatinnissaallu Naalakkersuisuni pingaartipparput. Pikialasorsuup siunissami aqunneqarnissaa pillugu kommunip ICC-llu suleqatiginissaat pingaartipparput. 2022-mi Qaanaaliarnissarput naatsorsuutigaara, sumiiffiullu atorneqarnera illersorneqarneralu pillugit innuttaasut toqqaannartumik oqaloqatigisinnaaniassagatsigit. Taama Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund nangilluni oqarpoq.

Sumiiffik uumassusilinnut kulturimullu pingaarutilerujussuusoq nalunaarusiami erseqqissarneqarpoq. Pingaartumik sumiiffiup eqqaani najugalinnut, nunatsinni Canadamilu. Taakkumi Pikialasorsuup uumasorpassuaqarneratigut kulturikkut imminnut atapput.

Canadamiut nalunaarusiaat oqaatsit assigiinngitsut atorlugit saqqummersinneqassaaq, ilaatigut kalaallisut aamma inuktitut. Canadami ilisimatuut Kalaallit Nunaanni ilisimatuunik (Pinngortitaleriffik) Danmarkimilu ilisimatuunik (DCE, Aarhus Universitet) qanimut suleqateqarnerisigut nalunaarusiaq pinngorpoq. Sumiiffiup ataatsimut aqunneqarnissaanut anguniakkat qanoq pilersaarnermik nalunaarummik suliaqarnissamut suleqatigiinnertik Kalaallit Nunaata, Canadap Danmarkillu ingerlatiinnassavaat.

Nalunaarusiaq oqaatsini tallimani atuarneqarsinnaassaaq uanilu nassaarineqarsinnavoq:

  • Kalaallisut: Pikialasorsuarmut eqqaanullu uumassusillit pingaassusiisa, paasissutissat amigaatigineqartut akornusersuutaasinnaasullu suunerinik aalajangiussineq
  • Inuktitut: ᓇᓗᓇᐃᖅᓯᓂᖅ α±α•ˆα–…αΈα“ͺα“•αŠα”ͺᓕᕆᓂᕐᒧᑦ ᐅᔾᔨᕐᓇᖅᑐᓂᒃ, ᖃᐅᔨα’ͺᓂᕆᔭᐅα”ͺᑦ ᐱᑕᖃᙱᑦᑐᑦ αŠα’»α’ͺα“— ᖃᐅᔨᔾα”ͺᑕᐅα”ͺᑦ ᐅᑭᐅᖅᑕᖅᑐα’₯ᑦ ᐃα’ͺᕐᒧᑦ αŠα’»α’ͺα“— αŠα‘­αŠα“‚α‘¦ ᐃᓂᐅα”ͺᑦ
  • Qallunaatut: Identifikation af økologisk betydning, videnshuller og stressfaktorer for Nordvandet og tilstødende områder
  • Tuluttut: Identification of Ecological Significance, Knowledge Gaps and Stressors for the North Water and Adjacent Areas

Franskisut: Détermination de l’importance écologique, des lacunes dans les connaissances et des agents de stress pour les eaux du nord et les zones adjacentes


Paasissutissat:

Pikialasorsuaq tassaavoq Kalaallit Nunaata kitaata avannaani Avanersuup Canadamilu Nunavut akornanni imarnersaq. Pikialasorsuaq Issittumi imarnersat annersaasa ilagaat. Imarnersaq (polynie) tassaavoq immami sikusartumi imarnersaq annertooq sikuneq ajortoq.





Tigusiffik: Natural Ressources Canada


Attavissaq

Nalunaarusiaq Pinngortitaleriffiup nittartagaani aamma saqqummiunneqassaaq. Nalunaarusiaq pillugu sammisamut tunngasunik apeqqutissaqaraanni Pinngortitaleriffik attavigineqarsinnaavoq.

Paasisaqarnerorusukkuit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaq Mette Skarregaard Pedersen attavigisinnaavat, tlf.: 346476/529844 imaluunniit e-mail: mesp@nanoq.gl imaluunniit pan@nanoq.gl.