Tusarniaaneq – 2026-mi sinerissap qanittuani qaleralinniarluni aalisarnermi pisarineqarsinnaasut tamarmiusut
Matumuuna sinerissap qanittuani qaleralinniarluni aalisarnermi pisarineqarsinnaasut tamarmiusut aalajangersarneqarnerat pillugu tusarniaanermi allakkat saqqummiunneqarput.
Danskisut kalaallisullu tusarniaanermut akissuteqaammik tunniussinissamut piffissaliussaq tassaavoq ulloq 12-11-2025, nal. 16.00 nassiunneqassaarlu uunga apn@nanoq.gl.
Siunnersuummut nassiunneqartumut akissuteqannginneq akuersinertut isigineqassaaq. Tusarniaanermut piffissaliussap sivitsorneqarsinnaanera periarfissaanngilaq: Publikationer
Atuisut ilisimasaat
Sinerissap qanittuani qaleralinniarnermi aqutsinissamut pilersaarut malillugu tassanilu ilanngunneqartumi apeqqutinut immersuiffissaq qaleralinnianut akissuteqarfigisassanngor-lugu nassiussuunneqarpoq, qalerallit takissusaanut paasissutissat akissutigineqartassallutik, qalerallit takissusaannut paasissutissat Aalisarnermut siunnersuisooqatigiit TAC pillugu siunnersuummut oqallinnerannut tunngaviusassaaq. Taamaalilluni atuisut ilisimasaasa TAC-ip aalajangersarneqarneranut peqataatinneqartarnissaannut qulakkeerinnippoq. Ukioq manna 17. oktober 2025 ataatsimeeqatigiinneq pivoq. Atuisut ilisimasaat pillugit nalilersuilluni nalunaarusiaq uani takuneqarsinnaavoq:
Qalerallit NAFO 1B – 1F aamma Tunu
2026-mi sinerissap qanittuani qaleralinniarluni aalisarnermi pisarineqarsinnaasut tamarmiusut tusarniaanermi uani pineqarput.
Kalaallit Nunaanni sinerissap qanittuani qaleralinniarluni aalisarnermi pisarineqarsinnaasut tamarmiusut pillugit sinnersuut, Kalaallit Nunaanni sinerissap qanittuani qaleralinniarnermi aqutsinissamut pilersaarut pillugu siunnersuummit aallaaveqarpoq.
Siunissami sapinngisamik aalisarnerup aningaasaqarnikkut pitsaanerpaamik inuiaqatigiinnut pissarsissutaasarnissaata qulakkeerneqarnissaa pillugu anguniagaqarnermit aqutsinissamut pilersaarut aallaaveqarpoq, matumani qalerallit nungusaataanngitsumik atorneqarnissaat pingaartinneqarpoq, aalisagaqatigiillu amerlassusiat aalaakkaasuutinneqassaaq siunissami ungasinnerusumi pitsaanerpaarpaamik pissarsissutaasinnaalersillugu. Taamaattumik pisarine-qarsinnaasunik tamarmiusunik aalajangersaanermi siunertaavoq, siunissami aqutsiveqarfinni tamani pisarineqartut tamarmiusut akuerisaasut ilisimatuussutsikkut siunnersuinermut naapertuuttunngortinnissaat.
Aqutsiveqarfinnut 1B (Sisimiut), 1C (Maniitsoq), 1D (Nuuk), 1E (Paamiut) aamma 1F-imut (Qaqortoq) qalerallit pillugit ilisimatuussutsikkut siunnersuineq, ukiunut marlunnut 2025-2026-mut atuuppoq. Siunnersuineq ukiup siulianit allannguuteqanngilaq.
Aqutsiveqarfinni marlunni; Qaanaaq aamma Tunu, ilisimatuussutsikkut siunnersuinermut tapersiisinnaasut paasissutissat tunngavigineqartut naammanngillat. Paasissutissat tunnga-vigineqartut ilisimatuussutsikkut siunnersuinermik tapersiisinnaanngornissaasa tungaannut, aqutsiveqarfinni taakkunani pisarineqarsinnaasut tamarmiusut mianersornissamut tunngavis-saatitaasoq aallaavigalugu aalajangersarneqartassapput.
Aqutsinissamut pilersaarutip piffissami atuuffiani (2025-2029) Qaanaamut pisarineqarsinnaasut tamarmiusut aalaakkaasut, aallaavittut isigalugu 2024-mi pisarineqarsinnaasut tamarmiusut atuuttut malillugit aalajangersarneqartassapput. Aalisarnerup ineriartornera ukiumut malinnaavigineqartarpoq aamma pisarineqarsinnaasut tamarmiusut aalajangersarneqartarnerat matuminnga aallaaveqartumik nalilersuiffigineqarsinnaavoq.
Tunumi sinerissap qanittuani qaleralinnut aqutsinissamut pilersaarutissatut siunnersuut naapertorlugu, aqutsinissamut pilersaarutip piffissami atuuffiani (2025-2029) pisarineqarsinnaasut tamarmiusut aalaakkaasut aalajangersarneqassapput. Tamanna 2024-mi atuuttuusimasunit pisarineqarsinnaasunit tamarmiusunit aallaaveqarpoq. Aalisarnerup ineriartornera ukiut tamaasa nalilersuiffigineqartarpoq, pisarineqarsinnaasunillu tamarmiusunik aalajangersaaneq tamanna aallaavigalugu naleqqussarneqarsinnaalluni.
Ilisimatuussutsikkut siunnersuineq naapertorlugu aqutsiveqarfinni allani pisarineqarsinnaasut tamarmiusut aalajangersarneqassapput, kisianni pisassiissutit tamarmiusut ukiumiit ukiumut annerpaamik 10 %-imik nikerarsinnaapput.
Siunnersuutigineqarpoq Nuummut TAC 5%-imik annikillisinneqassasoq aammalu Paamiunut TAC 5%-imik annikillisinneqassasoq. Sisimiut-Maniitsorlu siunnersuinermut naleqqussar-neqareernikuuvoq.
Siunnersuinermi, pisarineqarsinnaasut tamarmiusuni aamma pisassiissutini pisarineqartuni ineriartorneq, takussutissiami 2-mi takukkit.
Qalerallit Qeqertarsuup Tunuani, Uummannami aamma Upernavimmi (Aqutsiveqarfik 47)
Aqutsiveqarfinnut Upernavimmut, Uummannamut aamma Qeqertarsuup Tunuanut qalerallit pillugit ilisimatuussutsikkut siunnersuineq, ukiunut marlunnoortuuvoq 2025-2026-mullu atuulluni. Piffissamut 2023-2024-mut tunngatillugu siunnersuineq allannguiffigineqarnikuuvoq, matumani siunnersuineq Qeqertarsuup Tunuanut 20 %-imik qaffariaateqarpoq, Upernavimmut 4,43 %-imik appariaateqarpoq aamma Uummannamut 9,3 %-imik appariaateqarluni. 2026-mut pisarineqarsinnaasut tamarmiusut, 2025-mut pisarineqarsinnaasunit tamarmiusunit piviusunit aallaaveqarput, aqutsinissamut pilersaarummut sanilliullugu 5 %-imik apparneqar-nerannik ilaqartumik, tassani siunnersuinermut naapertuuttunngorlugit ukiumut minnerpaamik 5 %-imik appaasoqarnissaa piumasaqaataammat. Pisassiissutit tamarmiusut aamma ilisimatuussutsikkut siunnersuinerup akornanni assigiinngissuseq malunnartorujussuuvoq.
Qeqertarsuup Tunuanut pisassiissutit 13.594 tons-iussasut siunnersuutigineqarpoq.
Uummannamut pisassiissutit 9.922 tons-iussasut siunnersuutigineqarpoq.
Upernavimmut pisassiissutit 10.481 tons-iussasut siunnersuutigineqarpoq.
2018-2024-mut siunnersuinerup, pisassiissutit tamarmiusut aamma pisassiissutinit pisat ineriartornerannut takussutissiat ilanngussaq 1-imi takukkit.
2026-mut PNNP-mi paggatassanullu pisassiissutit annertussusissaa aatsaat 2026-imi januarip ingerlanerani paasinarsissaaq paggatassiilluni aalisartut PNNP-nut nuuttut pisassaasa annertussusaat paasinarsippata.
