Toqusunut nunatsinni peqqinnissaqarfimmit misissorneqarsimasunut angallassinissamut Namminersorlutik Oqartussat nalunaarutaat
Suliarineqarsinnaasut amerlanerpaat nunatsinni peqqinnissaqarfinniitinniarneqartarput, taamaattorli peqqinnissaqarfinni piginnaasatigut atortutigulluunniit katsorsaanermi immikkut piumasaqaataasut peqqinnissaqarfimmit pissarsiarineqarsinnaaneq ajorput. Taamaammallu Rigshospitalimi Danmarkimiittumi suliaritittariaqartarlutik. Danmarkimi nakorsiartoqassatillugu angalanermut, unnuinernut nerisaqarnernullu aningaasartuutit peqqinnissaqarfimmiit aningaasartuutigineqartarput. Danmarkimi nakorsiartut ilaat akuttugaluartumik toqusarput, ilaatigut kukkusumik katsorsartissimanikkut, nappaatimit pinartoqarnikkut imaluunniit nakorsiartup ukiui peqqutaallutik. Nunani allani katsorsartillutik toqusartut, peqqinnissaqarfimmillu misissortissimasut eqqarsaatigalugit, napparsimasutut kingunerani inisisimajunnaartarput, taamaammallu Napparsimasut najugaqarfimmi avataani misissorneqarnerani katsorsarneranilu kiffartuussinerit pillugit Namminersornerullutik Oqartussat nalunaarutaat nr. 2, 24. januar 2005-imeersoq tunngavigalugu angallanneqarnissaanut inatsisitigut pisinnaatitaaffeqarunnaartarlutik. Napparsimallutik toqusut illerfiinik assartuinissamut aningaasartuutinut ataavartumik aaqqiissutissat nalunaarusiami pineqartumi qulakkeerneqassaaq.
Illerfinnik assartuinissamut 2024-mi aamma 2025-mi Aningaasanut inatsimmi immikkoortitsisoqarpoq. Illerfinnik assartuisarnermi utaqqiisaasumik tapiissutitut aningaassaliissutaajunnaarlutik ataavartumik aningaassaliissutinngortinneqarnissaat nalunaarummi pineqartumi siunertaavoq.
Peqqinnissaqarfiup sullissineri il.il. Inatsisartut peqqussutaat tunngavigalugu nalunaarut atuutilersinneqassaaq, aamma konto pingaarnermi 34.11.12-meersumik, maannakkut pissutsinik malittarisassiorneqartunik, inatsisitigut oqaasertaliussat taarserneqassapput.
Tusarniaanermut piffissarititaq
Siunnersuummut oqaaseqaataasinnaasut Peqqissutsimut Naalakkersuisoqarfimmit piaarnerpaamik aamma kingusinnerpaamik 20. januar 2025.-imi tigorusunneqarput. Oqaaseqataasinnaasut uunga nassiuteqquneqarput pn@nanoq.gl ilanngullugulu uunga haed@nanoq.gl