Matumani Nunalerinermut, Imminut Pilersuinermut, Nukissiutinut Avatangiisinullu Naalakkersuisoqarfiup Kalaallit Nunaanni imminut pilersornermut periusissiaq siullermut missingiut tamanut tusarniaassutigineqarnera nassiuppaa

Nunalerinermut, Imminut Pilersornermut Avatangiisinullu Naalakkersuisoqarfimmit, imminut pilersornermut periusissiaq pillugu oqaaseqaatissaqartoqaruni, kingusinnerpaamik ulloq marlunngorneq 10. decembari 2024-mi nal. 10 qinnutigineqarpoq.

Tusaniaassummut akissut naalakkersuisoqarfiup qitiusumik e-mailadressianut nassiuteqquneqarpoq: pan@nanoq.gl. Periusissiamut tunngatillugu apeqquteqartoqassaguni oqaaseqaatissaqartoqassagunilu matumani pan@nanoq.gl-imut saaffiginnissutigineqassaput.

Tuungaviusoq

Naalakkersuisunut politikkitigut nunami namminermi imminut pilersorsinnaaneq aalisarnerup, piniarnerup, nunalerinerup, uumasuuteqarnerup aamma naatitaateqarnermi tunisassiornerup iluani, kiisalu nukissiornerup, sanaartornerup sakkulerinernullu iluani annertusaanissaq salliutinneqarpoq. Imminut pilersornermut periusissiaq manna Naalakkersuisut imminut pilersornermut suliassaqarfiup iluani sulinerisa aallaqqaatigiinnarpaa. Inuussutissanut imminut pilersornerup iluani periusissiami ukkatarineqarpoq. Siunissami, periusissiap malitsigisaanik pisariaqartitanut allanut, siunertanut aamma periarfissanut ukkatarinniffiussapput.

Imminut pilersornerulernissamut periusissiap siunertaraa Kalaallit Nunaata inuussutissanik imminut pilersornerata annertusarnissaa, najukkami inuussutissanik tunisassiat pissarsiariuminarnerulernissaannut, suliffinnik pilersitsiortornissamut aammalu piujuartitsineq tunngavigalugu nunatsinni ineriartortitsinissamut najukkami inuussutissanik tunisassiornerup sunniuteqarluarnissaanut sinaakkusiussanik pilersitsinikkut pitsanngorsaanikkullu. Tamatuma saniatigut imminut pilersorsinnaanerup kulturikkut nukittuffiunerata erseqqissarneratigut attatiinnarneqarnissaat siuarsaqqinneqarnissaallu periusissiami ukkatarineqarpoq. Kalaallit Nunaanni tamakkiisumik imminut pilersorsinnaanissaq anguniagaanngilaq, tamanna niuerfimmit neqeroorutigineqarsinnaanngimmat aammalu atuisut taama kissaateqanngimmata. Imminulli pilersorsinnaassutsip pitsanngorsarneqarnissaa pingaartinneqarpoq najukkami inuussutissanik tunisassiat pigineqareersut siunissamilu tunisassiarineqarumaartut ilisimaneqarnerulersinnerisigut atugaanerulersinnerisigullu.

Naalakkersuisut Imminut pilersornerulernissamut periusissiaat Kalaallit Nunaata imminut pilersornerulernissaanut pingaarnerusunik sinaakkusersuillunilu najoqqutassaqartitsissaaq. Tamatumanilu Naalakkersuisut imminut pilersornerup siuarsarnissaanut sutigut iliuuseqarsinnaanerat aallaavigineqassaaq. Periusissami pingaarnertut ukkatarineqartut, anguniakkallu tassunga ilaasut, tassaapput:

1. Inuussutissanik tunisassiornissamut akimmiffeerutsitsineq aammalu Kalaallit Nunaanni inuussutissanik inuussutissarsiornermut sinaakkusiussanik nukittorsaaneq,
2. Piujuartussamik peqqinnartumillu najukkani inuussutissanik tunisassiornerup siuarsarnissaa,
3. Suleqatigiinnikkut nittarsaassinikkullu Kalaallit Nunaanni imminut pilersornerup nukittorsarneqarnera,
4. Najukkani kalaalimerninik eqqumaffiginnilersitsineq atuinerulersitsinerlu.

Periusissiap suliarineqarnerani innuttaasunik alaatsinaanneqartunik nunatsinni tamarmeersunik ukioqatigiinniillu tamaneersunik apersuinerit sisamat ingerlanneqarput aammalu soqutigisallit pingaarnerit 39-t apersorneqarlutik. Anguniakkat aamma siunnerfiit saqqummiunneqartut tamarmik soqutigisalinnik misissuinermit peqataatitsinermiillu pineqartumit ilisimasanik katersukkanik aallaaveqarput, apersuinerillu taakku periusissiami suut isummerfigineqarnissaasa suullu sulissutigineqarnissaasa aalajangersarnissaannut tunngavigineqarlutik.

Tusarniaanermi matumani imarasai taamaallaat nassiunneqassapput. Periusissiaq piareeqqasoq assilianngorlugu saqqummiunneqassaaq.